Ո՞վ, ո՞ւմ հետ և ինչպես. Ի՞նչ պետք է իմանալ Հայաստանի նոր խորհրդարանի մասին

ԿԸՀ նախագահ Տիգրան Մուկուչյանը քիչ առաջ հրապարակեց խորհրդարանական ընտրությունների նախնական արդյունքները, համաձայն որոնց Ազգային Ժողով է անցնում չորք քաղաքական ուժ՝ Հանրապետական կուսակցությունը, «Ծառուկյան» և «Ելք» դաշինքները և Դաշնակցությունը:

Ի՞նչ է թելադրում Ընտրական օրենսգիրքը այս պահից սկսած: Նոր Ազգային Ժողովի առաջին նիստը տեղի կունենա արդյունքների ամփոփումից հետո երրորդ հինգշաբթի օրը: Մոտավոր հաշվարկներով՝ ապրիլի 27-ին: Նոր Ազգային Ժողովը ձևավորելու է իր մարմինները՝ ԱԺ նախագահ, փոխխոսնակներ և այլն: Դրան հաջորդելու են Կառավարության ձևավորումն ու Կառավարության ծրագրի հաստատումը, ինչին հատկացված է 20 օր ժամանակ: Այսինքն՝ մինչև ապրիլի վերջ նոր Ազգային Ժողովի ձևավորման բոլոր ընթացակարգերը կավարտվեն, իսկ մինչև մայիսի վերջ՝ Կառավարության ու դրա ծրագրի հաստատման:

Նոր խորհրդարանն ունենալու է 105 պատգամավոր՝ 101-ը ընտրված խորհրդարանական ընտրությունների արդյունքում, ևս չորսը ազգային փոքրամասնությունների ներկայացուցիչ:

Ինչ վերաբերում է ընդդիմությանը, ապա այն պետք է կազմի նոր խորհրդարանի 1/3-ը: Համաձայն նախնական արդյունքների՝ «Ելք» դաշինքը ԱԺ-ում կստանա 9 մանդատ, «Ծառուկյան» դաշինքը՝ 30, այսինքն, ըստ էության, ընդդիմության համար բավարար ձայները այս երկու դաշինքների միաձուլմամբ լրանում են: Բայց արդյո՞ք նրանք կհամաձայնեն համագործակցել՝ հարց է, որ դեռ պետք է պատասխան ստանա: Այս պահի դրությամբ «Ծառուկյան» դաշինքից արդյունքները չեն մեկնաբանում:

ՀՀԿ-ն այսպիսով ստանում է 55 մանդատ, ՀՅԴ-ն՝ 7: Եթե դեռ երեկ թվում էր, որ ՀՀԿ-ին տված անհրաժեշտ քվեները չեն բավարարում միայնակ մեծամասնություն ձևավորելու համար և հին ընկեր Դաշնակցությունը կարող է դարձյալ կոալիցիոն գործընկեր դառնալ, այդպիսով իրավիճակը փրկելով երկրորդ փուլ ընտրությունների անցկացնելուց, ապա այսօր պարզ է դառնում, որ ՀՀԿ-ն, ըստ էության, կարող է կոալիցիա նույնիսկ չկազմել և միայնակ ձևավորել կառավարություն: Բայց ժամանակը ցույց կտա, թե ինչ կանի իշխող կուսակցությունը նման պայմաններում:

Իսկ մինչ այդ Հանրապետականը, գոնե այսօր, կվայելի տարբեր դիտորդական առաքելություններից լսվող գհանատականները, որոնց համաձայն՝ Հայաստանում կայացել են արդար, ազատ և ժողովրդավարական չափանիշներին ընդհանուր առմամբ համապատասխանող ընտրություններ, որոնցում թեև արձանագրվել են որոշակի ընտրախախտումներ, բայց դրանք չեն կարող ազդեցություն ունենալ ընտրությունների վերջնական արդյունքների վրա:

Լիա Խոջոյան