Միքայել արքեպիսկոպոս Աջապահյանը կկանգնի դատարանի առաջ՝ իշխանության զավթման կոչերի համար

Ավարտվել է Շիրակի թեմի առաջնորդ Միքայել արքեպիսկոպոս Աջապահյանի նկատմամբ քննվող քրեական գործի նախաքննությունը։ Նրան մեղադրում են հրապարակային կոչեր հնչեցնելու մեջ, որոնք, ըստ ՔԿ-ի, ուղղված են եղել իշխանության զավթմանն ու սահմանադրական կարգի տապալմանը։

ՀՀ քննչական կոմիտեն հայտարարում է, որ ավարտել է Շիրակի թեմի առաջնորդ Միքայել արքեպիսկոպոս Աջապահյանի նկատմամբ քրեական վարույթի նախաքննությունը։ Քննության տվյալներով՝ վերջինս հարցազրույցներից մեկում հայտարարել է, թե նախկին երկու նախագահներին բազմիցս առաջարկել է բանակում, ոստիկանությունում և ԱԱԾ-ում ծառայող իր գաղափարակից գեներալների միջոցով իրականացնել ռազմական հեղաշրջում։

Քննչական մարմինը գնահատել է այդ հայտարարությունները որպես զանգվածային լրատվության միջոցներով արված հրապարակային կոչեր՝ ուղղված իշխանության զավթմանն ու սահմանադրական կարգի բռնի փոփոխմանն։ Այս հիմքով Աջապահյանի նկատմամբ հարուցվել է քրեական հետապնդում՝ ՀՀ քրեական օրենսգրքի 422-րդ հոդվածի 2-րդ մասով։

Նրան մեղադրանք էր առաջադրվել նույն հոդվածով, և հունիսի 28-ին որպես խափանման միջոց ընտրվել էր երկու ամսով կալանավորումը։

Քրեական գործը մեղադրական եզրակացությամբ փոխանցվել է հսկող դատախազին՝ այն հաստատելու և դատարան ուղարկելու առաջարկությամբ։ Քննչական կոմիտեն հիշեցնում է, որ Աջապահյանը համարվում է անմեղ, քանի դեռ նրա մեղավորությունը չի ապացուցվել օրենքով սահմանված կարգով՝ դատարանի օրինական ուժի մեջ մտած դատավճռով։