Ես տեղյակ եմ այն լուրերից, որ շրջանառվում են իմ քաղաքականություն վերադառնալու հետ կապված, իբր ես վերադարձել եմ պայմանավորվածության արդյունքում: Ես վստահ եմ, որ ժողովուրդը լավ գիտի իրականությունը, որովհետև եթե դա պայմանավորվածություն լիներ՝ 2015 թվականին ես չէի հեռանա: Այս մասին Արագածոտնի մարզի Թալին համայնքում այսօր հայտարարել է «Ծառուկյան» դաշինքի առաջնորդ Գագիկ Ծառուկյանը.
«Հարց եմ տալիս՝ 2015-ը ձեզ համար ապացույց չէ՞ր: Ապացույց չէր, որ ոչ մի պայմանավորվածություն չկա, որովհետև ժողովուրդը պատրաստ էր դուրս գալու արյունահեղության, բայց ես դա թույլ չտվեցի, հեռացա: Բայց այսօր ես տեսնում եմ իմ վերադառնալու պահանջը ու եկել ու ասում եմ՝ գնացեք ու ընտրեք, մեզ հնարավորություն տվեք ու մենք երկիրը կփոխենք»,- հայտարարել է նա:
Գագիկ Ծառուկյանը անդրադարձել է նաև իր կողմից ներկայացվող ծրագրի ընդդիմախոսների հայտարարություններին: Ըստ նրա՝ դաշինքը ներկայացնում է իր ծագիրը, իսկ դրան զուգահեռ որոշ մարդիկ փնովում են, թե Ծառուկյանը պոպուլիզմով է զբաղված:
«Ի՞նչ պոպուլիզմի մասին է խոսքը, երբ մենք մեր գործունեությամբ ենք ապացուցել այն, թե ինչ կարող ենք անել ու ինչ փոփոխություն կարող ենք բերել, մենք գործի մարդ ենք»,- հայտարարել է նա:
Ծառուկյանի խոսքով՝ դաշինքը առաջարկում է լուրջ հաշվարկների վրա հիմնված ծրագիր, որի առաջնահրեթ 15 կետերը կյանքի կկոչվեն անմիջապես ընտրություններից հետո, եթե «Ծառուկյան» դաշինքը ստանա վստահության 50+1 տոկոսը:
«Ասել ենք, որ թոշակները բարձրացնելու ենք ու բարձրացնելու ենք: Ասել ենք, որ բանկի տոկոսները իջեցնելու ենք ու այդպես էլ անելու ենք՝ վարկերը կլինեն 2-5 տոկոս: Մենք առաջարկում ենք առողջացման ծրագիր, որը թույլ կտա ժողովրդին շնչել ու ոտքի կանգնել: Անհնարին ոչինչ չկա»,-ասել է նա:
Արագածոտնի մարզում իր այսօրվա հանդիպումների ժամանակ Գագիկ Ծառուկյանը անդրադարձել է նաև կրթական ոլորտի խնդիրներին: Նրա խոսքով՝ չպիտի այնպես լինի, որ պետությունը չկարողանա հոգ տանել գերազանցիկ ու լավ սովորող երախաների մասին, որոնք այսօր դուրս են մնում կրթական համակարգից գումար չունենալու պատճառով:
Ծառուկյանը նշում է, որ կրթության ոլորտում առկա խնդիրները պետք է լուծվեն պետական միջոցներով ու աջակցությամբ, որը թույլ չի տա երեխաներին դուրս մնալ համակարգից, իսկ հետագայում, երբ նրանք կանցնեն աշխատանքի, այդ գումարները կվերադարձվեն տարիների ընթացքում աշխատավարձի պահումներից: Սա անհրաժեշտ է նաև, որպեսզի լավ կրթություն ստացած մասնագետը չհեռանա երկրից, ինչպես այսօր է և իր գործն ու գիտելիքը ներդնի երկրի ու տնտեսության զարգացմանը:
«Անցած տարիների ընթացքում Հայաստան մեծ գումարներ են եկել՝ գյուղատնտեսության, փոքր ու միջին բիզնեսի զարգացման համար, և բանկերը կարող էին գյուղացուն 3-4 տոկոսով վարկեր տալ: Բայց իրականում գյուղացիներին վարկեր են տրվել 24-30 տոկոսով: Եթե բիզնեսի շահույթը 7-15 տոկոս է, իսկ գյուղացուն 24-30 տոկոսով են վարկ տալիս, ապա նշանակում է, որ խորտակման եզրին եք կանգնած՝ վերցնում եք, աշխատում եք բանկի համար, ձեր ունեցվածքն էլ մնալու է բանկերին: Մեր ծրագրի կյանքի կոչման դեպքում գյուղատնտեսական վարկերը կլինեն 2-5 տոկոս, որպեսզի մարդիկ կարողան շնչել, իսկ նախկինում վերցրծ բարձր տոկոսներով վարկերը պետք է վերանայվեն, պատասխանատուները պատժվեն»,- հավաստիացրել է նա Աշտարակում:
Իր հանդիպումների վերջում Ծառուկյանը հորդորում է ժողովրդին այս անգամ շատ լուրջ վերաբերվել ընտրությանը ու ընձեռված հնարավորությունը ճիշտ օգտագործել, այլապես հաջորդ հինգ տարիները կործանարար կարող են լինել Հայաստանի համար, եթե ապրիլի 2-ին ոչինչ չփոխվի.
«Ժողովուրդ ջան, ձեզ տրված է հնարավորություն, ում հավատում եք՝ գնացեք նրան էլ ընտրեք: Կարող է մարդուն չսիրեք, բայց մարդու արած գործը պիտի գնահատեք, այլապես հինգը տարի ի՞նչ եք անելու: Մենք գիտենք իրականությունը ու պատրաստ ենք այն փոխել»,- հավաստիացնում է նա:
Ամփոփելով նախընտրական քարոզչության առաջին շաբաթը նկատենք, որ ամենից մարդաշատ հանդիպումներ անցկացնում են երկու քաղաքական գործիչներ՝ «Ծառուկյան» դաշինքի առաջնորդ Գագիկ Ծառուկյանը և Հանրապետական կուսակցության փոխնախագահ Կարեն Կարապետյանը: Այս երկուսի տարբերությունը թերևս նրանում է, որ Ծառուկյանի հանդիպումները կայանում են համայնքների հրապարակներում ու բացօթյա տարածքներում, իսկ ՀՀԿ-ինը՝ հիմնականում փակ տարածքներում, դահլիճներում: Այս վերջին հանգամանքը կասկածի տեղիք է տալիս ադմինիստրատիվ ռեսուրսի կիրառման խոսակցությունների մասով, ինչը անընդհատ բարձրաձայնում են քաղաքական մյուս ուժերը, որոնց նախընտրական հանդիպումներին մարդկանց մասնակցությունը շատ փոքր է:
