Երևանը ներդնում է քաղաքային կառավարման ժամանակակից տեխնոլոգիաներ

«Վեոլիա Ջուր» ընկերությունը, որը պատասխանատու է Հայաստանի ջրամատակարարման համար, միացել է «Ակտիվ քաղաքացի» բջջային հավելվածին: Այժմ Երևանի բնակիչները կկարողանան հաղորդել ջրամատակարարման հետ կապված խնդիրների մասին այս հավելվածի միջոցով, հայտնում է Երևանի քաղաքապետարանը:

Երևանի քաղաքապետարանում ներդրված աշխարհագրական տեղեկատվական (GIS) համակարգը շարունակում է համալրվել նոր տվյալներով: Արդեն իսկ հասանելի է սուրճի, սննդի և վճարային տերմինալների տեղադիրքի վերաբերյալ տեղեկատվություն: Մշակվել է նաև հարթակ՝ շինթույլտվությունների, կապուղիների հետագծերի, ժամկետների և աշխատանքների որակի վերահսկման համար: Քարտեզավորման համակարգը կօգտագործվի նաև աղբահանության կազմակերպման վերահսկման համար՝ աղբատար մեքենաների աղբամաններին մոտենալուց մինչև աղբի տեղափոխում:

«Թվայնացման այս գործիքները մեզ էականորեն նոր ժամանակաշրջան են տեղափոխում: GIS համակարգի տեխնոլոգիաներն էականորեն բարձրացնում են Երևանի կառավարման արդյունավետությունը: Այս վերլուծությունների շնորհիվ մեր աշխատանքն ավելի կպարզեցվի, և երևանցիներն էականորեն ավելի գոհ կլինեն մեր աշխատանքից», — նշել է քաղաքապետը:

Նախորդ շաբաթվա ընթացքում տոմսային համակարգում արձանագրվել է 88 150 վավերացում տրոլեյբուսներում, 505 257՝ մետրոպոլիտենում և 1 831 196՝ ավտոբուսներում: Նախորդ շաբաթվա համեմատ աճը կազմել է 7 655 վավերացում:

Երևանի մետրոպոլիտենում գործարկումից ի վեր առաջին անգամ փոխարինվում են շարժասանդուղքները: «Սասունցի Դավիթ» կայարանում աշխատանքներն արդեն ավարտվել են, իսկ ներկայումս գործընթացը շարունակվում է «Զորավար Անդրանիկ» կայարանում: Այս ոչ միշտ նկատելի աշխատանքների հիմնական նպատակը մետրոպոլիտենի և ուղևորների անվտանգության ապահովումն է:

Տարեսկզբից Երևանում անցկացվել է ոռոգման շուրջ 10 կմ նոր համակարգ: 2025 թվականին նախատեսվում է անցկացնել ընդհանուր առմամբ 25 կմ նոր ցանց: Քաղաքային ծառատունկի ընթացքում տնկվել է շուրջ 1 300 ծառ և ավելի քան 200 մշտադալար թուփ: Այս շաբաթ նոր անտառային գոտի կստեղծվի Աշտարակից Երևան մտնող ավտոճանապարհին հարող լանջերին: Քաղաքը ձեռք է բերել մոտ 10 հազար մշտադալար թուփ, իսկ ևս 40 հազարն արտադրվել է համայնքային տնկարանային տնտեսությունում: Վերջին երկուսուկես տարում Երևանում տնկվել է 20 հազարից ավելի ծառ, իսկ տարեվերջին այդ թիվը կմոտենա 25 հազարի:

2022-2025թթ. ընթացքում Երևանում ապամոնտաժվել է արտաքին գովազդի ընդհանուր առմամբ 21 902 կրիչ, որոնցից 588-ը՝ մեծ տեղեկատու դաշտով: Արտաքին գովազդի տեղադրման նոր թույլտվություններն հիմնականում վերաբերում են ոչ թե նոր տեղերում գովազդի տեղադրմանը, այլ հին կրիչները նորերով փոխարինելուն: Քաղաքապետ Տիգրան Ավինյանը հանձնարարել է աշխատանքներ տանել, որպեսզի Երևանի ավագանու որոշմամբ հետագայում բացառվի սիզամարգերի հատվածներում արտաքին գովազդ տեղադրելու թույլտվության տրամադրումը: