ԱՄՆ-ի և Ուկրաինայի նախագահների հանդիպումը Վաշինգտոնում ավարտվել է հարաբերությունների անսպասելի սրմամբ՝ Ուկրաինայի ընդերքի վերաբերյալ շրջանակային համաձայնագրի ստորագրման փոխարեն: Կողմերը փոխադարձ մեղադրանքներ են փոխանակել լրագրողների ներկայությամբ:
Ուկրաինայի նախագահ Վլադիմիր Զելենսկու այցը Վաշինգտոն վերածվել է դիվանագիտական ձախողման: Ամերիկյան լրատվամիջոցների փոխանցմամբ, ԱՄՆ նախագահ Դոնալդ Թրամփի հետ հանդիպումը, որը նախատեսված էր հազվագյուտ հողային մետաղների վերաբերյալ համաձայնագրի ստորագրման համար, վաղաժամկետ ավարտվել է Օվալաձև աշխատասենյակում լրագրողների ներկայությամբ՝ փակ դռների հետևում տեղի ունեցած լարված բանավեճից հետո:
Ուկրաինայի նախագահը լքել է Սպիտակ տունը՝ առանց նախապես պլանավորված համատեղ մամուլի ասուլիսի անցկացման: Անմիջապես ձախողված բանակցություններից հետո, Դոնալդ Թրամփն իր Truth Social սոցիալական ցանցում հաղորդագրություն է տեղադրել, որում հայտարարել է, որ իր կարծիքով, Ուկրաինայի նախագահը «պատրաստ չէ խաղաղության»:
«Ես ավելի ոչինչ չեմ ուզում, ես խաղաղություն եմ ուզում: Նա անհարգալից վերաբերմունք ցուցաբերեց Օվալաձև աշխատասենյակում: Նա կարող է վերադառնալ, երբ պատրաստ լինի խաղաղության», - գրել է Թրամփը:
Սպիտակ տնից հեռանալուց հետո Վլադիմիր Զելենսկին իր X միկրոբլոգում հաղորդագրություն է հրապարակել. «Շնորհակալություն, Ամերիկա, շնորհակալություն ձեր աջակցության համար, շնորհակալություն այս այցի համար: Շնորհակալ եմ Դոնալդ Թրամփին, Կոնգրեսին և ամերիկյան ժողովրդին: Ուկրաինային անհրաժեշտ է արդար և կայուն խաղաղություն, և մենք աշխատում ենք հենց դրա վրա»:
Թրամփի և Զելենսկու հանդիպման մանրամասները
Նախագահների հանդիպումը տեղի է ունեցել փետրվարի 28-ին Վաշինգտոնում՝ հազվագյուտ հողային մետաղների վերաբերյալ գործարք կնքելու նպատակով: Բանակցությունների մի մասը հեռարձակվել է ուղիղ եթերով, որի ընթացքում Թրամփը հայտարարել է, որ ուկրաինացի նախագահը պետք է փոխզիջումների գնա Ռուսաստանի հետ բանակցություններում և գործարք կնքի ԱՄՆ-ի հետ: Ամերիկացի առաջնորդի խոսքերով, Վաշինգտոնն արդեն սկսել է քննարկել Մոսկվայի հետ խաղաղության համաձայնագրի պարամետրերը:
Բանակցություններին մասնակցել է նաև ԱՄՆ-ի փոխնախագահ Ջեյ Դի Վենսը, ով նախատել է Զելենսկուն ամերիկյան օգնության համար շնորհակալություն չհայտնելու համար: «Դուք գոնե մեկ անգամ շնորհակալություն ասացի՞ք այս հանդիպման ընթացքում: Ասեք գոնե մի քանի երախտագիտության խոսք Միացյալ Նահանգներին և նախագահին, ով փորձում է փրկել ձեր երկիրը», - հայտարարել է Վենսը:
Թրամփն, իր հերթին, Զելենսկու հետ խոսել է վերջնագրային ձևով՝ մեղադրելով նրան Երրորդ համաշխարհային պատերազմի հրահրման մեջ: «Սա բարդ գործարք կլինի, քանի որ վերաբերմունքը պետք է փոխվի: Կամ դուք գործարք եք կնքում, կամ մենք դուրս ենք գալիս, և դուք ստիպված կլինեք պայքարել ինքներդ ձեզ, բայց դուք խաղաքարտեր չունեք: Բայց դուք պետք է երախտագիտություն ցուցաբերեք: Դուք դա չեք ցուցադրում: Դա այնքան էլ լավ չէ ձեր կողմից», - ասել է Թրամփը:
Երբ Զելենսկին փորձել է պատասխանել ամերիկացի նախագահին՝ հարցնելով. «Կարո՞ղ եմ խոսել, պարոն նախագահ», Թրամփը պատասխանեց. «Ոչ, դուք արդեն բավականաչափ ասել եք»: «Դուք վիրավորում եք մեր երկիրը: Դուք պետք է երախտապարտ լինեք: Մարդիկ մահանում են, դուք բավարար զինվոր չունեք: Դուք չեք կարող ասել մեզ՝ ես ուզում եմ կամ չեմ ուզում զինադադար», - հայտարարել է ԱՄՆ նախագահը:
Ուկրաինացի նախագահի խոսքերով, Ռուսաստանի հետ ուղղակի զինադադարը չի աշխատի: Նա նշել է, որ Կիևը չի համաձայնի դադարեցնել ռազմական գործողությունները առանց խաղաղության երկարաժամկետ երաշխիքների: Զելենսկին կոչ է արել ԱՄՆ-ին՝ երաշխիքներ տրամադրել Մեծ Բրիտանիային և Ֆրանսիային՝ Ուկրաինայում խաղաղապահ ուժեր տեղակայելու համար, հայտարարելով, որ հակառակ դեպքում Լոնդոնը և Փարիզը չեն իրականացնի այս նախաձեռնությունը:
ԱՄՆ-ի փոխնախագահն իր հերթին նախատել է Զելենսկուն. «Դուք կարծում եք, որ հարգալի՞ց է Միացյալ Նահանգների Օվալաձև աշխատասենյակ գալ և հարձակվել այն վարչակազմի վրա, որը փորձում է կանխել ձեր երկրի ավերումը»:
Ռուսաստանի ԱԳՆ-ի արձագանքը
Վլադիմիր Զելենսկու խոսքերը ԱՄՆ նախագահ Դոնալդ Թրամփին այն մասին, որ «ԱՄՆ-ը դեռ կբախվի խնդիրների», ակնարկում են Կիևի ահաբեկչական մեթոդների մասին: Այս մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան «Սոլովյով Live» հեռուստաալիքի եթերում, գրում է ՏԱՍՍ-ը:
«Զարմացնում է մեկ այլ բան, և այն չափազանց վտանգավոր է: Դա այս արտահայտությունների միջև անցողիկ ձևակերպումն է, որ Ամերիկան դեռ կբախվի խնդիրների հետ, դեռ կզգա դրանք, ասել է Զելենսկին, - ուշադրություն է դարձրել Զախարովան: - ԱՄՆ նախագահը, փոխնախագահը նրան իր տեղը ցույց տվեցին, բայց հարցը այլ բանում է: Խոսքը կիևյան ռեժիմի կողմից ԱՄՆ-ին ուղղված բացահայտ սպառնալիքի մասին է: <...> Համաշխարհային փոքրամասնությունը չի լսել և չի ցանկացել լսել մեզ այն մասին, որ դա արդեն ահաբեկչականի մուտացիայի ենթարկված ռեժիմ է»:
