Հայաստանի դեսպանը հանդիպել է ՈՒՄՎ գլխավոր քարտուղարի հետ

Հունաստանում ՀՀ արտակարգ և լիազոր դեսպան Տիգրան Մկրտչյանը հանդիպել է Ուղղափառության միջխորհրդարանական վեհաժողովի գլխավոր քարտուղար, Հունաստանի խորհրդարանի պատգամավոր Մաքսիմոս Խարակոպուլոսի հետ:

Հույն խորհրդարանականը շնորհակալություն է հայտնել ուղղափառ խորհրդարանականների միջխորհրդարանական կառույցում հայկական խորհրդարանական պատվիրակության երկարամյա և ակտիվ մասնակցության համար և համոզմունք հայտնել, որ այդ համագործակցությունը կշարունակի մնալ նշանակալի և արդյունավետ ՝ հանուն խաղաղության և ընդհանուր քրիստոնեական արժեքների պահպանման:

Անդրադառնալով Ուղղափառության միջխորհրդարանական վեհաժողովի գործունեությանը ՝ դեսպան Մկրտչյանը կարևորեց միջազգային հանրության իրազեկվածության բարձրացումը քրիստոնեական հուշարձանների պահպանության, ինքնության խեղաթյուրման կամ ոչնչացման հարցերում:

Կողմերը պայմանավորվել են համագործակցել կազմակերպության պատվիրակության այցը Հայաստան նախապատրաստելու ուղղությամբ: