Երևանին և Բաքվին խաղաղության պայմանագիր առաջարկվում է կնքել արևմտյան թելադրանքով. ՌԴ ՊՆ

ՆԱՏՕ-ն և Եվրամիությունը Ռուսաստանի հետ առճակատման իրենց կուրսով լարվածության աճ են առաջացնում Վրաստանում, ինչպես նաև հայ-ադրբեջանական հարաբերություններում։ Այս մասին հայտարարել է ՌԴ պաշտպանության նախարար Անդրեյ Բելոուսովը, փոխանցում է ՏԱՍՍ-ը։

«Դաշինքի առանձին երկրներ ձգտում են ամրապնդել իրենց դիրքերը Կովկասում՝ դրանով իսկ ելք ստանալով դեպի Կասպից ծովի ռեսուրսները և ուղղակիորեն մուտք գործել դեպի Կենտրոնական Ասիա: Իրավիճակը ապակայունացվում  և Վրաստանում բողոքի ցույցերը ֆինանսավորվում են, որպեսզի ակտիվ հակառուսական գործողություններ ունենան»,- ասել է Բելոուսովը՝ ուրբաթ օրը ելույթ ունենալով Ալմաթիում ՀԱՊԿ պաշտպանության նախարարների խորհրդի նիստում:

Նա հավելել է, որ «միջնորդական ծառայություններն առանց ամաչելու պարտադրվում են Հայաստանին և Ադրբեջանին իրենց միջև  հակասությունները լուծելու համար»։ «Առաջարկվում է խաղաղության պայմանագիր կնքել բացառապես արևմտյան հարթակներում և թելադրանքով»,- նշել է ՌԴ պաշտպանության նախարարը։

Նրա խոսքով, «առանձնապես մտահոգիչ են Վաշինգտոնի և Բրյուսելի ծրագրերը՝ անվտանգության և պաշտպանության ամրապնդման պատրվակով մեր հայ գործընկերներին իրենց շահերի ոլորտ ներգրավելու համար»։ ՌԴ պաշտպանության նախարարն ընդգծել է, որ ՆԱՏՕ-ի և Եվրամիության կուրսը Ռուսաստանի հետ առճակատման ուղղությամբ լարվածության աճ է առաջացնում ՀԱՊԿ հավաքական անվտանգության մի շարք գոտիներում։