«Տավուշը հանուն հայրենիքի» շարժման առաջնորդներն այսօր խորհրդակցություններ են անցկացրել

«Տավուշը հանուն հայրենիքի» շարժման առաջնորդներն այսօր ողջ օրվա ընթացքում խորհրդակցություններ են անցկացրել քաղաքական ուժերի և հասարակական շարժումների հետ։ Այս մասին հայտնել է Բագրատ արքեպիսկոպոս Գալստանյանը։

«Մենք հանդիպեցինք «Ապրելու երկիր» կուսակցության, «Հայաքվե» շարժման ներկայացուցիչների, քաղաքագետ Սուրեն Սուրենյանցի, եզդի համայնքի ներկայացուցիչների, բժիշկների և այլոց հետ»,- ասաց Գալստանյանը։ Նրա խոսքով, առաջիկայում նախատեսվում է մեծ հանդիպում բոլոր քաղաքական ուժերի ներկայացուցիչների հետ, բոլոր առաջարկները կքննարկվեն ու որոշումներ կկայացվեն։

Բագրատ Սրբազանն անդրադարձել է նաև Արյունաբանական կենտրոնի տնօրենի պաշտոնից ազատմանը.

«Սամվել Դանիելյանը ազնիվ մարդ է: Նրա պաշտոնանկությունն անիմաստ էր, քանի որ շուտով լրանալու էր նրա պաշտոնավարման ժամկետը։ Դա արվեց միայն մեկ պատճառով՝ մեզ հետ ունեցած մտերմության պատճառով: Ահա թե ինչպես են այս իշխանությունները փորձում պատժել: Սա նշանակում է ռեպրեսիաների սկիզբ»,- ասաց նա։