Գերխնդիր է նոր որակի ընդդիմության ձևավորումը. Սուրեն Սուրենյանց

Վերջին օրերին Նիկոլ Փաշինյանի շրջապատի գործիչներն ակտիվացրել են արտահերթ ընտրությունների թեման. այս մասին գրում է քաղաքագետ Սուրեն Սուրենյանցը և շարունակում:

"Այսօր էլ դրա մասին խոսում էր Սամվել Բաբայանը: Եթե նույնիսկ Փաշինյանը ցանկանում է հերթական անգամ բեմականացնել «արտահերթ ընտրություններ - իշխանության վերարտադրություն» կոմբինացիան, ընդդիմությունը չպետք է «պատերազմ» հայտարարի արտահերթ ընտրությունների գաղափարին:

Նախ, լեգիտիմ իշխանության ձևավորման այլ մեխանիզմ, ըստ էության, գոյություն չունի: Երկրորդ՝ չպետք է թույլ տալ, որ իշխանությունը խաղա ընդդիմության ֆոբիաների վրա. հենց դա է իշխանության «կենսունակության» բանաձևը: Եվ վերջապես՝ խնդիրը ոչ թե արտահերթ ընտրություններով իշխանության անխուսափելի վերարտադրությունն է, այլ գործող ընդդիմության որակը, ինչի պարագայում իշխանության երկարաձգումը երաշխավորված է՝ լինի ընտրությունների, թե ընդդիմության վախերը կառավարելու ճանապարհով:

Ուրեմն, գերխնդիր է այնպիսի ընդդիմության ձևավորումը, որն ընտրություններից չի վախենում՝ առնվազն այն վստահությամբ, որ զարգացման իր ծրագիրը կարող է կոնսոլիդացնել հասարակությանը", - գրել է Սուրենյանցը: