ԵՄ-ն կոչ է արել Ադրբեջանին ապահովել Լաչինի միջանցքով ազատ տեղաշարժը

Եվրոպական հանձնաժողովի անունից ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը պատասխանել է սոցիալիստների և դեմոկրատների քաղաքական խմբի Եվրախորհրդարանի պատգամավոր Դիմիտրիս Պապադակիսի՝ Լաչինի միջանցքի շրջափակման պատճառով Լեռնային Ղարաբաղում ստեղծված հումանիտար ճգնաժամի վերաբերյալ գրավոր հարցին։

Բորելը, մասնավորապես, ասել է, որ դեկտեմբերի սկզբից ԵՄ-ն ուշադիր հետևում է Լաչինի միջանցքի երկայնքով և դրա շուրջ տեղի ունեցող իրադարձությունների զարգացումներին և դրա հետևանքներին։

"ԵՄ-ն նախկինի պես լրջորեն անհանգստացած է ազատ տեղաշարժի և կենսական նշանակության ապրանքների մատակարարման շարունակական սահմանափակումներով, որոնք լուրջ խնդիրներ են առաջացնում տեղի բնակչության համար",- հայտնել է Բորելը:

Նա նաև ասել է, որ ԵՄ-ն կոչ է արել Ադրբեջանին քայլեր ձեռնարկել միջանցքով ազատ տեղաշարժն ապահովելու համար՝ եռակողմ հայտարարության դրույթների համաձայն: