ԱԺ պատգամավորներին մանդատից զրկելու հարցի քննարկումը մեկ շաբաթով հետաձգվեց

Ազգային ժողովի խորհուրդը հունվարի 13-ին գումարել է նիստ, որը վարել է ԱԺ նախագահ Ալեն Սիմոնյանը:

Քննարկվել եւ հաստատվել են Ազգային ժողովի ութերորդ գումարման հինգերորդ նստաշրջանի, ինչպես նաեւ հունվարի 16-ին գումարվող հերթական նիստերի օրակարգերի նախագծերը:

Սահմանվել է նաեւ հերթական նիստերի օրակարգային հարցերի քննարկման հաջորդականությունը:
ԱԺ հերթական նիստերի օրակարգի նախագծում կընդգրկվի 25 հարց:

«Ազգային ժողովի պատգամավորների լիազորությունները դադարեցնելու հարցով Սահմանադրական դատարան դիմելու մասին» ԱԺ խորհրդի որոշման նախագծի քննարկումն «Ազգային ժողովի կանոնակարգ» սահմանադրական օրենքի 156-րդ հոդվածի 5-րդ մասի համաձայն՝ հետաձգվել է մեկ շաբաթով:

Ավելի վաղ VERELQ-ը հայտնել էր, որ իշխանությունը մտադիր է մանդատներից զրկել ԱԺ "Հայաստան" խմբակցության 22 պատգամավորի՝ անհարգալի բացակայությունների պատճառով: Նրանց թվում են՝ Իշխան Սաղաթելյանը, Սեյրան Օհանյանը, Արմեն Գևորգյանը, Արծվիկ Մինասյանը, Գեղամ Մանուկյանը և այլք: