Լեմկինի ինստիտուտը դատապարտել է Ալիևի ցեղասպանական հռետորաբանությունը

Ցեղասպանության կանխարգելման Լեմկինի ինստիտուտը մեծապես մտահոգված է ցեղասպանական հռետորաբանությամբ, որն Ադրբեջանի նախագահ Իլհամ Ալիևն օգտագործել է իր վերջին ելույթներում` կրկնելով Հայաստանի վրա հարձակում գործելու սպառնալիքները:

Այս մասին ասվում է Լեմկինի ինստիտուտի Twitter-յան գրառման մեջ։

«Դատապարտում ենք Ադրբեջանի նախագահի և Ադրբեջանի կառավարության կողմից հատուկ ցեղասպանական հռետորաբանության օգտագործումը։ Արտահայտությունները մեղմելով նա փորձ է անում քողարկել ցեղասպանական հռետորաբանությունն ու մտադրությունները։ Կոչ ենք անում միջազգային հանրությանը դատապարտել այս հռետորաբանությունը և պաշտպանել հայերին», - նշված է գրառման մեջ։

Լեմկինի ինստիտուտը տարածված հաղորդագրության մեջ, որպես օրինակ է բերում Ալիեւի խոսքերը, թե հայերին «ողբերգություն է սպասվում» կամ «Ադրբեջանի համբերության բաժակը լցվել է»։ Ինստիտուտը միջազգային հանրության ուշադրությունն է հրավիրում այս հռետորաբանությանը՝ հայ ժողովրդի դեմ նոր ցեղասպանությունից խուսափելու համար։