Մակրոնը Ռուսաստանին մեղադրել է Ադրբեջանի կողմից Հայաստանի դեմ գործելու համար

Ֆրանսիայի նախագահ Էմանուել Մակրոնը France 2-ի L’Événement հաղորդման ժամանակ Ռուսաստանին մեղադրել է Ադրբեջանի կողմից Հայաստանի դեմ գործելու մեջ։

«Հայաստանը մի երկիր է, որի հետ մենք առանձնահատուկ կապ ունենք։ Որովհետև Հայաստանը միշտ պայքարել է այս տարածաշրջանում հանդուրժողականության և խաղաղության համար...

Երկու տարի առաջ պատերազմ եղավ Լեռնային Ղարաբաղում, որը միջազգայնորեն չճանաչված և վիճելի տարածք է, բայց Հայաստանը Ղարաբաղում էր, քանի որ Ղարաբաղն այս երկրի սրտում է։ Ադրբեջանը սարսափելի պատերազմ սկսեց՝ բազմաթիվ զոհերով ու դաժան տեսարաններով և գրավեց այս տարածքը։

Այս տարվա սեպտեմբերին Ադրբեջանը մի քանի հարձակողական գործողություններ ձեռնարկեց սահմանի երկայնքով՝ գուցե իր տարածքի մի հատվածից մյուսը միջանցք բացելու համար։ Մենք դա միանշանակ դատապարտեցինք։ Եվրախորհրդի նախագահի հետ միասին հավաքեցինք Հայաստանի վարչապետին ու Ադրբեջանի նախագահին ու որոշեցինք, որ առաջին հերթին կողմերը պետք է պարտավորվեն ճանաչել 1991թ. սահմանները:

Իսկ ի՞նչ է կատարվում այս սահմանին արդեն երկու տարի։ Այնտեղ 5000 ռուս զինվոր կա։ Այս դիմակայության հիմքում հակամարտությունն է: Ռուսաստանը օգտվեց այս հակամարտությունից, միջամտեց հակամարտությանը և հստակ խաղաց Ադրբեջանի խաղը Թուրքիայի մեղսակցությամբ և վերադարձավ այնտեղ՝ թուլացնելու Հայաստանը։ Իսկ այն, ինչ տեղի է ունենում այստեղ, ապակայունացնող մանեւր է Ռուսաստանի կողմից, որը փորձում է անկարգություններ ստեղծել Կովկասում՝ մեզ բոլորիս թուլացնելու ու պառակտելու նպատակով։

Ֆրանսիան այստեղ է, ներկա է և հանդես է գալիս որպես միջնորդ ուժ։ Եվ մենք չենք լքի հայերին: Ֆրանսիան ադրբեջանական գազ չի գնում, պայմանավորվածություն չկա: Իհարկե, եվրոպական մի քանի երկրներ գազային պայմանագրեր ունեն։ Ինչ վերաբերում է Ֆրանսիային և Եվրոպայի ձայնին, ուղիղ նայելով ձեր աչքերի մեջ և մեր բոլոր հայրենակիցների առջև, պետք է ասեմ, որ մեր արժեքներն ու սկզբունքները հնարավոր չէ գնել ո՛չ գազի, ո՛չ նավթի միջոցով», - մեջբերում է Մակրոնի խոսքերը Բաղրամյան-26 տելեգրամային ալիքը։