Միայն զենքով է հնարավոր վերականգնել և պաշտպանել ՀՀ տարածքային ամբողջականությունը. Ասրյան

Միայն զենքո՛վ է հնարավոր վերականգնել և պաշտպանել Հայաստանի տարածքային ամբողջականությունը, այլ ոչ թե Ադրբեջանի ագրեսիան Հայաստանի ներսից և դրսից դատապարտող հայտարարություններով: Այս մասին հայտարարություն է տարածել «Հայոց Արծիվներ. Միասնական Հայաստան» կուսակցության նախագահ, «Հայոց Արծիվներ» կամավորական ջոկատի հրամանատար Խաչիկ Ասրյան:

«Հայաստանի իշխանությունը, ընդդիմությունը, Հայ ժողովուրդն այսուհետ պետք է անհապաղ զինվեն՝ դառնալով 100.000-անոց ԱԶԳ-ԲԱՆԱԿ (50.000-ը՝ զորահավաքից, 50.000-ը՝ Զինված Ուժերից), ասել է թե՝ մեկ տարվա ընթացքում անհնարինը դարձնել հնարավոր՝ ստեղծելով 100.000-անոց ԱԶԳ-ԲԱՆԱԿ: Եթե 1941 թվականին սովետական Հայաստանի մոտ 1,5 միլիոն բնակչությունից և աշխարհում այդ ժամանակ բնակվող մոտ 3,5 միլիոն Հայերից Հայրենական Մեծ Պատերազմին մասնակցել է շուրջ 600.000 Հայ (որոնցից զոհվել են շուրջ 300.000-ը), հիմա Հայաստանում բնակվող շուրջ 3 միլիոն Հայերից և աշխարհում բնակվող շուրջ 7 միլիոն Հայերից ո՞նց կարող է չկարողանանք ստեղծել 100.000-անոց Ազգ-Բանակ:

Միայն Եռագույնի, ասել է թե՝ Հայոց Ազգային Բանակի շուրջ համախմբված Հայաստանի իշխանությունը, ընդդիմությունը, Հայ ժողովուրդը կարող են ստեղծել 100.000-անոց Ազգ-Բանակ, որը կլինի ահ ու սարսափը Հայաստանի ու Հայ ազգի բոլոր թշնամիների համար:

Պարտադի՛ր է համախմբումը Եռագույնի, ասել է թե՝ Հայոց Ազգային Բանակի շուրջ:
Պարտադի՛ր է ստեղծումը Ազգ-Բանակի:
Պարտադի՛ր է վերականգնումն ու պաշտպանությունը Հայաստանի տարածքային ամբողջականության:
Պարտադի՛ր է հզորացումը Հայաստանի:

Կունենա՞նք 100.000-անոց Ազգ-Բանակ, ուրեմն, կապահովենք Հայաստանի ու Հայերիս տեղն արևի տակ, չե՞նք ունենա 100.000-անոց Ազգ-Բանակ, ուրեմն, կապահովենք Հայաստանի ու Հայերիս թշնամիների՛ տեղն արևի տակ":