Իշխանությունը «խմբագրում» է վարչապետի՝ տնտեսության «ծանր վիճակի» մասին հայտարարությունը
Հայաստանի իշխանական վերնախավը փորձում է այժմ յուրովի մեկնաբանել նորանշանակ վարչապետ Կարեն Կարապետյանի՝ Ազգային ժողովում կատարած խոստովանական հայտարարությունն առ այն, որ ՀՀ «տնտեսությունը շատ ծանար վիճամում է»:
Այժմ նշվում է, որ Հայաստանի վարչապետի՝ տնտեսության ծանր վիճակում լինելու մասին հայտարարությունը վերաբերում է զարգացման մոդելին, ոչ թե ուղղակի տնտեսության ներկա իրավիճակին:
«Կարծում եմ, որ թեզն ավելի մանրամասն կբացվի. իմ տրամաբանությամբ նա շեշտեց, որ նախկին զարգացման ռեսուրսը սպառված է, և անհրաժեշտ են նոր մոտեցումներ, նոր ռեսուրսներ հետագա աճի ապահովման համար: Խոսքը չի վերաբերում, որ տնտեսական աճ չի եղել, խոսքը չի վերաբերում, որ թվերն իրական չեն, այլ խոսքը վերաբերում է զարգացման տնտեսական մոդելին, որը առկա էր, և հարկավոր է նոր մոտեցում, որը կշարադրվի վարչապետի կողմից՝ շուտով»,-լրագրողների հետ զրույցում հայտարարեց ՀՀ փոխվարչապետ, միջազգային տնտեսական ինտեգրման և բարեփոխումների նախարարի պաշտոնակատար Վաչե Գաբրիելյանը։
Ազգային ժողովում կառավարության հետ հարց ու պատասխանի ժամին նորանշանակ վարչապետ Կարեն Կարապետյանը, խոսելով ՀՀ տնտեսությում առկա խնդիրների եւ ապագայում զարգացման ուղղություների մասին, խոստովանեց, որ տնտեսությունը «շատ ծանր վիճակում է»: «Մեր տնտեսության վիճակը չափազանց ծանր է», - ասաց Կարապետյանը՝ առանց նշելու տնտեսության զարգացման ներկային մոդելի թերությունները:
Փոխվարչապետը նաեւ կարծում է, որ տնտեսության ծանր վիճակի մասին խոստովանությունը կամ «ծանր վիճակն» ինքնին չի ազդում ներդրումների վրա: «Ներդրումների հարցում Հայաստանի ծանր վիճակը որևէ վատ կերպ չի արտացոլվում: Կարեն Կարապետյանի միտքը նրանումն է, որ անհրաժեշտ է շատ մեծ քանակի ներդրումներ, ներդրումների գրավում և չեմ կարծում, որ այստեղ կա հակասություն: Այդ նոր մոտեցումը շուտով կշարադրվի վարչապետի կողմից»,-ասաց նա:
Հատկանշական է, որ տնտեսության ծանր վիճակի ու ներդրումների իրականացման տրամաբանության մեջ կապի բացակայության մասին փոխվարչապետի հայտարարությունը որեւէ աղերս չունի ՀՀ տնտեսությունում անգամ ներդրումների դինամիկայի վերաբերյալ պաշտոնական վիճակագրության հետ: Ըստ պաշտոնական վիճակագրության, Հայաստանի տնտեսության իրական հատվածում օտարերկրյա ներդրումների զուտ հոսքերի ծավալը 2015 թվականին կազմել է մոտ 123,7 մլրդ դրամ։ Դրանից ավելի քան 70,4 մլրդ դրամն ուղղակի ներդրումներն են (ՕՈՒՆ): 2014 թվականի համեմատ ընդհանուր ներդրումները նվազել են մոտ 43,8 մլդ դրամով կամ ավելի քան 26%-ով, իսկ միայն ՕՈՒՆ-ները՝ 46,8 մլրդ դրամով կամ 40%-ով։
