ԱՄՆ-ն ռազմական ծանր տեխնիկա է ուղարկել Վրաստան՝ Agile Spirit զորավարժությունների համար

News Georgia լրատվական գործակալության փոխանցմամբ՝ ԱՄՆ-ն ռազմական ծանր տեխնիկայի խմբաքանակ է ուղարկել Վրաստան՝ մասնակցելու համար առաջիկայում ՆԱՏՕ-ի հովանու ներքո անցկացվող Agile Spirit համատեղ զորավարժություններին:

Ողջ տեխնիկան, որը գտնվում է Բուլղարիայի Նովո Սելոյի զորավարժարանում, հաջողությամբ բեռնվել է երկաթուղային տրանսպորտի վրա՝ ԱՄՆ ծովային հետևակայինների հետ: Տանկերի, «Համեր» ավտոմեքենաների, 7 տոննայանոց ռազմական բեռնատարների, դեսանտային մեքենաների ու հրետանային զենքի խմբաքանակն ուղարկվել է նավահանգիստ, որտեղից էլ Սև ծովով լաստանավով կուղարկվի Վրաստան:

Այդ գործողությունը կոչված է ի ցույց դնելու ՆԱՏՕ-ի կարողությունը՝ արագորեն կազմակերպել, բեռնել և Եվրոպայի ցանկացած երկիր հասցնել ռազմական տեխնիկա:

Agile Spirit զորավարժություններին կմասնակցեն Վրաստանի, ԱՄՆ-ի, Բուլղարիայի, Ռումինիայի, Լատվիայի, Թուրքիայի և Ուկրաինայի զինված ուժերի ներկայացուցիչները:

Ավելի վաղ Վրաստանի ՊՆ-ն հայտնել էր, որ զորավարժություններն անցկացվելու են Թբիլիսիից ոչ հեռու գտնվող Վազիանիի զորավարժարանում ու Օրպոլոյում: Agile Spirit զորավարժություններն անցկացվում են ամեն տարի՝ սկսած 2011 թվականից: