«Զանգեզուրի պղնձամոլիբդենային կոմբինատ» ՓԲԸ-ն դատական հայց է ներկայացրել Երևան քաղաքի ընդհանուր իրավասության դատարանի ընդդեմ «Լիդիան Արմենիա» ՓԲԸ-ի, հայտնել է Ecolur-ը: ԶՊՄԿ-ն պահանջում է պարտավորեցնել «Լիդիան Արմենիային» հրապարակայնորեն հերքելու 2018 թվականի հուլիսի 26-ին ընկերության ֆեսբուքյան և յութուբյան էջերում հրապարակված «իրականությանը չհամապատասխանող և զրպարտչական բնույթի տեղեկությունները»: Դատարանը հայցադիմումը վարույթ է ընդունել, ներկայում հայցը գտնվում է դատաքննության փուլում: Գործը քննում է Երևան քաղաքի ընդհանուր իրավասության դատարանի նախագահ Ռուբեն Վարդազարյանը: Մի քանի դատական նիստ արդեն տեղի է ունեցել: Հերթական նիստը նշանակված է ապրիլի 10-ին՝ ժամը 11:30-ին: Ավելի վաղ «Լիդիան Արմենիայի» յութուբյան էջում տեսանյութ էր հրապարակվել, որտեղ նշվում էր, թե կոմբինատի մեքենայով սնունդ է մատակարարվում Ամուլսարի հանքի շահագործման դեմ պայքարող ցուցարարներին:
