Արցախի նախագահի վերահսկողության ծառայությունը այսուհետ դառնալու է պետական վերահսկողական ծառայություն։ Արցախում ստեղծվելու է նաեւ տարածքային կառավարման և զարգացման նախարարություն, որում ներառված է լինելու նաև բնական ռեսուրսների կառավարման հատվածը։ Այս մասին ֆեյսբուքյան իր եթերում հայտնեց Արցախի նախագահ Արայիկ Հարությունյանը: Ներկայումս, նրա խոսքով, ԱՀ կառավարությունում էկոնոմիկայի և արտադրական ենթակառուցվածքների ու բնապահպանության և բնական ռեսուրսների նախարարություններ են գործում: Նախագահը նշել է, որ փոփոխության է ենթարկվելու Մշակույթի, երիտասրդության հարցերի և զբոսաշրջության նախարարությունը՝ վերածվելով ռազմահայրենասիրության, երիտասարդության, սպորտի և զբոսաշրջության նախարարության: Ըստ նախագահի՝ ռազմահայրենասիրությունը, բանակ-հասարակություն կապը լինելու են նոր ձեւավորվող կառավարության գլխավոր ուղղություններից մեկը։ Լինելու են նաեւ կադրային խոր փոփոխություններ, մի շարք պաշտոնյաներ լքելու են իրենց պաշտոնը:
