ՀՀ ԱԺ տնտեսական հարցերի մշտական հանձնաժողովը դեկտեմբերի 22-ի արտահերթ նիստում շարունակել է նախորդ օրն ընդմիջված «Զբոսաշրջության մասին» եւ կից նախագծերի փաթեթի երկրորդ ընթերցմամբ քննարկումը: Հիմնական զեկուցող, ՀՀ էկոնոմիկայի նախարար Վահան Քերոբյանը նշել է, որ օրենսդրական փաթեթն առանցքային նշանակություն կունենա ոլորտի զարգացման գործում: Ըստ նախարարի` փաթեթն ընդգծում է առաջիկա բնագավառի` 5-10 տարիների զարգացման ուղղություններն ու հեռանկարները: Անդրադառնալով պատգամավորների ներկայացրած առաջարկներին` Վահան Քերոբյանը փաստել է, որ դրանց հիմնական մասն ընդունվել է ամբողջությամբ, իսկ մյուս մասը հաշվի է առնվել: Նրա խոսքով լրամշակված օրենսդրական փաթեթը կոնսեսուսային տարբերակ է: ԱԺ «Հայաստան» խմբակցության պատգամավոր, հանձնաժողովի անդամ Թադեւոս Ավետիսյանը հետաքրքրվել է` որքա՞ն բեռ դա կավելացնի փոքր ու միջին ձեռնարկատիրության վրա: Ի պատասխան` ՀՀ էկոնոմիկայի նախարարը նշել է, որ օրենսդրական փաթեթի կիրարկումը կնպաստի զբոսաշրջությամբ զբաղվող փոքր ու միջին ձեռնարկատիրության զարգացմանը: Վահան Քերոբյանի հավաստմամբ Կառավարությունն ունի ծրագիր, որով սուբսիդավորվում են ոլորտում գործունեություն իրականացնող ընկերությունները: Ընդգծվել է նաեւ բնագավառում Կառավարության վերահսկողական գործառույթների իրականացման կարեւորությունը: Մտքերի փոխանակությանը պատգամավորները հիմնականում շեշտադրել են ոլորտի օրենսդրորեն կարգավորման անհրաժեշտությունը: ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանը կարեւորել է օրենսդրական փաթեթի վրա միասնական, համակողմանի, արդյունավետ աշխատանքը: Հանձնաժողովականները քվեարկությամբ նախ ընդունել են ներկայացված բոլոր առաջարկները, ապա դրական եզրակացություն են տվել «Զբոսաշրջության մասին» եւ կից նախագծերի փաթեթի լրամշակված տարբերակին:
