Սյունիքի մարզի որևէ գյուղ Ադրբեջանին հանձնելու հարց չի քննարկվում: Այս մասին «Ֆեյսբուք»-ի իր էջում գրել է Սյունիքի փոխմարզպետ Նարեկ Բաբայանը: «Այս պահի դրությամբ Սյունիքի մարզի ճանապարհները, Կապան-Գորիս մայրուղին անվտանգ են, մարզի սահմանները վերահսկելի են ու անվտանգ, մարզում որեւէ տեղ սահմանազատման աշխատանք չի կատարվում, Սյունիքի մարզից որեւէ գյուղ հանձնելու հարց չի քննարկվում, Կապանի օդանավակայանը գտնվում է կմնա Կապան համայնքի տարածքում»,- ասված է գրառման մեջ: VERELQ-ը հիշեցնում է, որ ավելի վաղ Կապանի քաղաքապետ Գևորգ Փարսյանը հայտնել էր, որ խորհրդային քարտերի համաձայն Հայաստանի և Ադրբեջանի միջև սահմանը անցնում է Կապանի օդանավակայանի մոտով, սակայն օդանավակայանը կմնա Հայաստանի տարածքում:
