Լսիր նիկոլ՝ պարկեշտության սահմանները մի անցնի. Օնիկ Գասպարյան

ԶՈւ գլխավոր շտաբի պետ Օնիկ Գասպարյանն արձագանքել է վարչապետի պաշտոնակատար Նիկոլ Փաշինյանին:

VERELQ-ը ներկայացնում է Գասպարյանի հայտարարությունը, որը փոխանցվել է Armlur.am-ին.

«Հարգելի հայրենակիցներ՝ ի պատասխան ՀՀ վարչապետի աթոռը զբաղեցնող անձի հայտարարությունների, ստիպված եմ արձագանքել.

պատասխանատվությունից երբեք չեմ խուսափել, իմ զինակից ընկերների եւ ենթակաների թիկունքում չեմ թաքնվել եւ պատրաստ եմ պատասխանտալ իմ ողջ գործունեության համար։ Համոզված եմ, որ իշխանափոխությունից հետո անցկացվելու է օբյեկտիվ քննություն եւ յուրաքանչյուր պաշտոնատար անձ ստանալու է իր արժանին։

Լսիր նիկոլ՝ պարկեշտության սահմանները մի անցնի։ Ես գիտեմ, որ դու էժանագույն շոուների մեծագույն վարպետ ես եւ պետության կառավարման հարցերում բացարձակ անկարողությունը քողարկում ես հասարակությանը կերակրելով անհիմն զգացմունքային հայտարարություններով։

Ի դեպ՝ բուկլետ բաժանելը քեզ մոտ շատ լավ է ստացվում (չնայած պարբերաբար բուկլետով խփում են դեմքիդ մետրոներում)։

Իսկ Ղազախի գյուղերի հետ կապված ուզում եմ թարմացնեմ հիշողությունդ՝ քննարկման ընթացքում ես ասել եմ, որ այս հարցը Արցախի հետ կապ չունի եւ հավանական է այն որպես դիվանագիտական հնարք միտումնավոր արտացոլվել է հայտարարության նախագծում, հետագայում սակարկելու եւ մեզ «ընդառաջելով» այն նախագծից հանելու համար։

Նաեւ նշել եմ, որ անհրաժեշտ է բանակցել եւ հայտարարության նախագծից այդ կետը հանել։ Այդ հարցը ես նաեւ քննարկեցի ԱԱԾ տնօրեն Արմեն Աբազյանի հետ եւ ի պատիվ իրեն ու իր ջանքերի շնորհիվ այդ կետը հանվեց։

Ամեն դեպքում նիկոլ, ես շնորհակալ եմ, որ Քենեդու սպանության մեջ ինձ դեռ չես մեղադրում»:

VERELQ-ը հիշեցնում է, որ  մայիսի 30-ին սպիտակցիների հետ հանդիպմանը վարչապետի պաշտոնակատար Նիկոլ Փաշինյանը՝ նկատի ունենալով ԳՇ նախկին պետ Օնիկ Գասպարյանին, ով Քոչարյանի ղեկավարած դաշինքի անդամ է, հայտարարել էր. «Ես ընդունում եմ իմ սխալը, որ 2018 թվականին վարչապետ դառնալով, զինվորի հաց գողացող բոլոր գեներալների վզակոթին տալով դուրս չեմ վռնդել, որովհետև նրանք հիմա դարձել են Քոչարյանի, Սերժի բուկլետ բաժանող, դա ձեր կյանքի բարձրագույն կոչումն է, դուք բուկլետ բաժանող եղել եք, բուկլետ բաժանող էլ կմնաք, էս ժողովուրդը ձեզ չի ներելու ծախու գեներալներ, չի՛ ներելու»: