Վճռաբեկ դատարանը բեկանեց նաև Մարտի 1-ի գործով որպես մեղադրյալ ներգրավված երկրապահ կամավորականների միության վարչության նախագահ Սասուն Միքայելյանի մեղադրական դատավճիռը: Վճռաբեկ դատարանը ճանաչեց և հռչակեց Միքայելյանի անմեղությունը իրեն առաջադրված մեղադրանքում: Վերջինս, հիշեցնենք, Մարտի 1-ի դեպքերից հետո դատապարտվել էր 8 տարվա ազատազրկման՝ մեղավոր ճանաչվելով զանգվածային անկարգություններ կազմակերպելու համար: Ավելի քան 3 տարի բանտում անցկացնելուց հետո նա համաներմամբ ազատ արձակվեց 2011 թվականի մայիսին:
