ՌԴ Դաշնային խորհուրդն այսօրվա իր նիստում վավերացրել է Եվրասիական տնտեսական միության Մաքսային օրենսգրքի մասին պայմանագիրը: Փաստաթուղթը ԵԱՏՄ-ի անդամ հինգ պետությունների ղեկավարների կողմից ստորագրվել է 2017 թվականի ապրիլի 11-ին: Ակնկալվում է, որ օրենսգիրքն ուժի մեջ կմտնի այն բանից հետո, երբ պայմանագրի վավերացման վերաբերյալ ծանուցումներ ստացվեն մասնակից բոլոր երկրների (Ռուսաստան, Բելառուս, Հայաստան, Ղազախստան, Ղրղզստան) կողմից: Ըստ ամենայնի, դա տեղի կունենա 2018 թվականի հունվարի սկզբին: Նշենք, որ հոկտեմբերի 26-ին Պետական դուման վավերացրել է ԵԱՏՄ մաքսային օրենսգրքի մասին պայմանագիրը: Այն ուժի մեջ կմտնի 2018 թվականի հունվարի 1-ից: Իսկ ՀՀ կառավարությունը հոկտեմբերի 26-ի նիստում հավանություն տվեց ԵԱՏՄ Մաքսային օրենսգրքի վավերացման նախագծին։ Օրենսգիրքն ուժի մեջ կմտնի 2018-ի հունվարի 1-ին։ Դրա հիմնական սկզբունքներն են էլեկտրոնային հայտարարագրման ընդլայնումը, մաքսատնից ապրանքների արձակման արագացումը (1 օրվա փոխարեն՝ 4 ժամ հայտարարագրելուց հետո)։