Աշխատանքից ազատվելու դիմումներ են ներկայացրել ՀՀ երկու փոխոստիկանապետերը՝ Հայկ Մհրյանն ու Տիգրան Եսայանը: Այդ մասին VERELQ-ի հետ զորւցում տեղեկացրեց Տիգրան Եսայանը՝ փաստացի հաստատելով մամուլում իր և մյուս փոխոստիկանապետ Հայկ Մհրյանի ազատման մասին լուրը: «Այո, հաստատում եմ: Այդպես է», - ասաց նա՝ նշելով, որ պաշտոնից ազատվելու պատճառների մասին դեռևս չի ցանկանում խոսել: Ավելի վաղ մամուլում լուրեր էին շրջանառվում, որ ՀՀ երկու փոխոստիկանապետերը՝ Հայկ Մհրյանն ու Տիգրան Եսայանը աշխատանքից ազատվելու դիմումներ են ներկայացրել: «Մի կողմից Ամուլսարի ու Մաշտոցի պուրակի հետ կապված խնդիրները, ահագնացող սոցիալական բողոքի հիմքով ծագած ու ծագելիք բողոքի ալիքները, մյուս կողմից էլ կադրային խնդիրները լուրջ պրոբլեմ են դառնալու կառույցի համար», - գրել է «168 ժամը»: Հայկ Մհրյանը 2018-ի իշխանափոխությունից հետո եղել է Նոր Նորք վարչական շրջանի ղեկավար, ապա կարճ ժամանակ՝ «Արմավիր» քրեակատարողական հիմնարկի պետի տեղակալ, որից հետո նշանակվել է ՀՀ փոխոստիկանապետի պաշտոնում: Նա էր համակարգում արտակարգ դրության պայմաններում դրա կատարումն ապահովելու գործընթացը: Տիգրան Եսայանը 2012-2019 եղել է ՀՀ ոստիկանության կրթահամալիրի պետի 1-ին տեղակալ:
