Ռուսաստանի դեսպան Սերգեյ Կոպիրկինն իր արձակուրդն է անցկացնում՝ այցելելով Հայաստանի տեսարժան վայրեր: Արմավիրի մարզ կատարած այցի շրջանակներում դիվանագետը նաեւ այցելել է Ռուսաստանի Անվտանգության դաշնային ծառայության Սահմանապահ վարչության Արմավիրի սահմանապահ ջոկատ, հաղորդում է Հայաստանում Ռուսաստանի դեսպանատան Facebook-ի պաշտոնական էջը: «Արձակուրդի շրջանակներում Հայաստանում Ռուսաստանի դեսպան Ս. Պ. Կոպիրկինը ընտանիքի հետ շարունակում է ծանոթանալ հանրապետության տեսարժան վայրերին։ Օգոստոսի 12-ին նրանք այցելեցին Արմավիրի մարզ, որտեղ ծանոթացան մի շարք տեսարժան վայրերի, այդ թվում՝ Բագարան գյուղում գտնվող Սուրբ Շուշանիկ եկեղեցին (X դար) և VI դարում կառուցված Սուրբ Երրորդություն եկեղեցին։ Այցի ընթացքում Սերգեյ Կոպիրկինը նաև այցելել է Հայաստանում Ռուսաստանի Անվտանգության դաշնային ծառայության Սահմանապահ վարչության Արմավիրի սահմանապահ ջոկատ և հայ-թուրքական սահմանին գտնվող ուղեկալներ ու դիրքեր: Հանդիպել է ռուս եւ հայ սահմանապահների հետ, ծանոթացել նրանց կողմից իրականացվող խնդիրներին եւ ինչպես են նրանք համատեղ ծառայություն իրականացնում՝ պահպանելով Հանրապետության սահմանները», - ասված է հաղորդագրության մեջ:
