Հայաստանի կառավարությունը ընդլայնում է ոչխարաբուծության և այծաբուծության զարգացման պետական ծրագիրը՝ արձագանքելով մասնավոր հատվածի պահանջարկին: Այսուհետ ֆերմերները հնարավորություն կունենան պետական սուբսիդավորմամբ ձեռք բերել մինչև հազար գլուխ տոհմային կենդանի, ինչը կխթանի ոչ միայն մսի, այլև կաթի արտադրության ու վերամշակման ծավալների մեծացումը։ 2024-2028 թվականների ծրագրում փոփոխություններն ու լրացումները հաստատվել են գործադիրի մայիսի 14-ի նիստում: Էկոնոմիկայի նախարարի տեղակալ Արման Խոջոյանի խոսքով՝ նախկինում յուրաքանչյուր շահառուի համար փոխհատուցվում էր առավելագույնը 300 գլխի գնումը: Սակայն բիզնեսի ներկայացուցիչների արձագանքները վկայում են, որ ավելի մեծ գլխաքանակը թույլ կտա ստեղծել խոշոր և արդյունավետ ֆերմերային տնտեսություններ։ Ըստ նոր կարգավորումների՝ իրավաբանական անձինք և անհատ ձեռնարկատերերը կարող են հետ ստանալ գնված տոհմային մանր եղջերավոր կենդանիների արժեքի 50 տոկոսը: Արտերկրից ներկրման դեպքում փոխհատուցման առավելագույն չափը սահմանված է 450 հազար դրամ մեկ գլխի դիմաց, իսկ ներքին շուկայից տոհմային քարտով գնումներ կատարելիս՝ 300 հազար դրամ: Ծրագրի կարևոր նորամուծություններից է կենդանիների պարտադիր գրանցման պահանջը գյուղատնտեսական կենդանիների հաշվառման տեղեկատվական համակարգում, ինչը կապահովի գլխաքանակի հստակ հետագծելիությունը: Պաշտոնական տվյալներով՝ նախկին ծրագրերի շրջանակներում արդեն գնվել է շուրջ 2350 գլուխ կենդանի, իսկ ընթացիկ տարվա համար հաստատվել է ևս 1300 գլխի ձեռքբերման հայտ։