Ելույթ ունենալով Հանրապետության հրապարակում Նիկոլ Փաշինյանի մի քանի ուղերձ հղեց:
Նախ, նա նշեց, որ ոչ բռնի թավշյա հեղափոխության կայացման գործում աշխարհաքաղաքական ոչ մի կոնտենտ գոյություն չունի.
«Սա զտարյուն հայկական հեղափոխություն է»,- ասաց նա: Այնուհետ մեջբերեց ու շատ կարևորեց ՌԴ ԱԳՆ ներկայացուցիչ Մարիա Զախարովայի հայտարարությունը, որն արձագանքելով Սերժ Սարգսյանի հրաժարակին ասել է՝ Հայաստան, Ռուսաստանը միշտ քեզ հետ է.
«Ես հույս ունեմ, որ նմանատիպ արձագանք կլինի նաև միջազգային հանրության մյուս առանցքային ներկայացուցիչներից»,- նշեց Փաշինյանը:
Նիկոլ Փաշինյանը կոչ արեց հանրահավաքի մասնակիցներին շնորհակալություն հայտնել Արցախի իշխանություններին, որոնք, նրա խոսքով, պահպանեցին կատարյալ զսպվածություն ու չեզոքություն ստեղծված իրավիճակում և չտրվեցին գայթակղությունների ու սադրանքների: Նա կոչ արեց ծափահարել Արցախի Հանրապետությանը:
Փաշինյանը հիշեցրեց, որ իրենց օրակարգում ոչ թե մեկ, այլ մի քանի հարց էր դրված՝ Սերժ Սարգսյանի հրաժարականից բացի.
«Հրաժարականից հետո ԱԺ-ն վարչապետ է նշանակում ժողովրդի թեկնածուին և դա պետք է տեղի ունենա առաջիկա մեկ շաբաթվա ընթացքում, դրանից առաջ ձևավորվում է ժամանակավոր կառավարություն, որից հետո ՀՀ-ում տրամաբանական ժամկետներում պետք է տեղի ունենան արտահերթ խորհրդարանական ընտրություններ: Մենք ասացինք, որ պատրաստ ենք քննարկել Սերժ Սարգսյանի իշխանությունից հեռացման և իշխանության անցնցում փոխանցման պայմանները և հիմա, քանի որ նա հեռացել է, մենք պատրաստվում ենք չորեքշաբթի օրը, առավոտյան ժամը 11.00-ին Մարիոթ հյուրանոցում շարունակել բանակցությունները իշխանության անցնցում փոխանցման օրակարգի շուրջ Կարեն Կարապետյանի հետ: Եվ հույս ունեմ, որ ՀՀԿ վերնախավը միանշանակ և անվերապահորեն կճանաչի ժողովրդական թավշյա ոչ բռնի հեղափոխության հաղթանակը: Եվ որքան շուտ, այնքան ավելի լավ ՀՀ համար և Արցախի համար»,- շեշտեց նա:
Բացի այդ, նա հայտարարեց, որ Հայաստանում ատելության մթնոլորտը այլևս չի շարունակվելու և կոչ արեց բոլոր նրանց, ովքեր հիմա ճամպրուկներն են հավաքում, ու հատկապես օլիգարխները, հանգիստ լինեն ու չմտածեն կապիտալը Հայաստանից հանել. «Հայաստանում վենդետա չի լինելու այլևս»,- շեշտեց նա:
Նա ակնկալեց, որ իրենց շարժման բոլոր ձերբակալված ու կալանավորված անդամները մինչև օրվա վերջ ազատ կարձակվեն: Իսկ քաղբանտարկյալների ազատ արձակման գործընթացին, ասաց նա, կանդրադառնան հաջորդիվ:
Փաշինյանը կոչ արեց ոստիկանությանը դադարեցնել ակցիայի մասնակիցների բերման ենթարկելու գործընթացը: Բայց մի վերապահումով՝ ի դեմս ժողովրդի Հայաստանում կա ժողովրդի իշխանություն, բայց պետք է ցույց տան, որ այդ իշխանությունը կարող է իրավիճակը պահել 100 տոկոսով կառավարելի.
«Մեր այսօրվա տոնակատարությունը որևէ տհաճ միջադեպով չպետք է նշանավորվի: Այն պետք է լինի ուրախ, հաղթական, բայց որևէ ծառի ճյուղի որևէ վնաս պետք է չհասցվի: Հատուկ խնդրում եմ և կոչ եմ անում զերծ մնալ ալկոհոլի օգտագործումից՝ դա կարող եք անել երեկոյան ձեր տներում, ուշ ժամի: Ես կոչ եմ անում բացառիկ հարգալից վերաբերմունք բոլոր ոստիկանների և իրավապահ համակարգի աշխատողների նկատմամբ, միևնույն ժամանակ ակնկալում եմ և պահանջում, որ ոստիկանությունը նույնպիսի վերաբերմունք ցուցաբերի ՀՀ հաղթական քաղաքացու նլատմամբ: Մենք այս պահից սկսած պետք է լրջորեն զբաղվենք Հայաստանի ապագայի կառուցման և իրագործման հարցով: ՀՀ-ն պետք է այլևս լինի ազատ և երջանիկ պետություն, և ես համոզված եմ, որ միասին շատ շուտով կերտելու ենք, իրականություն ենք դարձնելու, ամբողջացնելու ենք ազատ և երջանիկ Հայաստանը»,- հավելեց նա իր ելույթը:
Վերջում Փաշինյանը հիշեցրեց հավաքվածներին, որ հայ ժողովուրդը հաղթել է և այդ հաղթանակը նրանից ոչ ոք խլել չի կարող:
Իսկ վաղը իրենց գործողությունները նվիրում ու տեղավորում են ապրիլի 24-ի տարելիցի՝ օրվա խորհուրդի համատեքստում: Նա վաղը ժամը 15.00-ին բոլորին ժամադրեց Հանրապետության հրապարակում, որտեղից կմեկնարկի քայլերթը դեպի Ծիծեռնակաբերդ:
