Խաչիկ Ասրյանը հյուրընկալվել էր Մեծի Տանն Կիլիկիո Ամենայն Հայոց Կաթողիկոս Արամ Առաջինին
2023 թվականի հուլիսի 1-ից 5-ը «Հայոց Արծիվներ․ Միասնական Հայաստան» կուսակցության նախագահ, «Հայոց Արծիվներ» կամավորական մարտական ջոկատի հրամանատար, գնդապետ Խաչիկ Ասրյանը պաշտոնական այցով մեկնել էր Լիբանան։
Անթիլիասի Մայր Տաճարում Խաչիկ Ասրյանը հյուրընկալվել էր Ն․Ս․Օ․Տ․Տ․ Մեծի Տանն Կիլիկիո Ամենայն Հայոց Կաթողիկոս Արամ Առաջինին։ Վեհափառ Հայրապետի հետ հանդիպմանը երկուստեք խոսվել և քննարկվել են 44-օրյա պատերազմի ողջ ժամանակահատվածին, «Հայոց Արծիվներ» կամավորական մարտական ջոկատի քաջերի կատարած սխրագործություններին, ինչպես նաև 44-օրյա պատերազմից ի վեր Արցախի և Սյունիքի պաշտպանության, Արցախի և Հայաստանի անկախության ու ինքնիշխանության պահպանմանն ու տարածքային ամբողջականությանը վերաբերող կարևորագույն հարցեր։
Քրիստոնեական Հավատքը, Հայոց Պետության Ազգային-Պետական Շահը, Քրիստոնյա Հայի ինքնությունը Քրիստոնյա Հայ Ազգի Արյան,Սրտի և Ուղեղի մեջ միշտ Գերագույնը պահելու համար՝ Խաչիկ Ասրյանը «ԼԵՌՆԱՀԱՅԱՍՏԱՆԻ ԱՐԾԻՎ» ոսկյա հուշամեդալով պարգևատրել է Ն․Ս․Օ․Տ․Տ․ Մեծի Տանն Կիլիկիո Ամենայն Հայոց Կաթողիկոս Արամ Առաջինին՝ հստակ նշելով, որ, եթե Հայ ազգն այսօր ունի երկու Կաթողիկոս, ուրեմն, երկուսն էլ Ամենայն Հայոց են ու այդպես պետք է ընկալվեն ու ընդունվեն, և հենց դա՛ է Քրիստոնեական արդարությունն ու ճշմարտությունը։
Խաչիկ Ասրյանը, նշելով Արամ Առաջինի՝ Սփյուռքում, Արցախում և Հայաստանում ունեցող բարձր վարկանիշը, խնդրել է Վեհափառ Հայրապետին՝ ժամ առաջ մեկնել Հայաստան, և իր բարձր հեղինակության շնորհիվ համախմբել ողջ Հայ ազգը՝ Արցախի և Հայաստանի առջև ծառացած բոլոր մարտահրավերներին դիմակայելու համար, ինչն էլ արժանացել է Վեհափառ Հայրապետի օրհնանքին և դրական պատասխանին։
Վեհափառ Հայրապետի առաջարկով՝ Խաչիկ Ասրյանը Բեյրութում հանդիպել է նաև Լիբանանում հրատարակվող և մեծ հեղինակություն վայելող ՀՅԴ «Ազդակ» օրաթերթի գլխավոր խմբագիր Շահան Գանտահարյանի հետ՝ նույնպես խոսելով 44-օրյա պատերազմի և հետպատերազմյան Արցախի ու Հայաստանի մասին։ Շահան Գանտահարյանի առաջարկով և բեյրութաբնակ Մինաս Ավագյանի ուղեկցությամբ՝ Խաչիկ Ասրյանը ժամանել է նաև Լիբանանի պատմական Այնճար քաղաք, որտեղ բացառապես ապրում են Հայեր՝ հիմնականում Մուսա Լեռան ժառանգներ։ Այնճարի ամբողջ պատմությունն ու իրականությունը՝ պատմամշակութային կոթողներ, հերոսների շիրիմներ, թանգարաններ, կրթօջախներ, ադմինիստրատիվ օջախներ, եկեղեցիներ, գյուղատնտեսական ոլորտ, բնակիչների հետ հանդիպումներ, Խաչիկ Ասրյանին ներկայացրել է ծնունդով Այնճարից, հայրենասեր հայորդի Եսայի Մարտիրոս Հավաթյանը, ում հետ զրույցում Խաչիկ Ասրյանն ասել է. «Այնճարն ամբողջ Սփյուռքում բնակվող բոլոր Հայերի Սփյուռքի Հայրենիքն է, 2-րդ Հայաստանը»:
Բեյրութում Խաչիկ Ասրյանը հանդիպել է նաև Հայ համայնքի ներկայացուցիչների հետ։
