Պետք է տեսնել, թե Բրիտանիան ինչպիսի արկեր է պատրաստվում փոխանցել Ուկրաինային: Բայց ամեն դեպքում պատասխանը կլինի համարժեք։ Այս մասին այսօր՝ մարտի 21-ին, հայտարարել է ՌԴ պաշտպանության նախարար Սերգեյ Շոյգուն՝ մեկնաբանելով Մեծ Բրիտանիայի պաշտպանության փոխնախարար Անաբել Գոլդիի` Ուկրաինային սպառված ուրանով զինամթերք փոխանցելու վերաբերյալ խոստումը։ «Տեսնենք, թե ինչ են նրանք փոխանցելու», - լրագրողներին ասել է Շոյգուն՝ հավելելով, որ Ռուսաստանը կարող է համարժեք պատասխանել, գրում է EAdaily-ն։ Նա նաեւ նշել է, որ նման հայտարարություններից հետո՝ միջուկային բախման հեռանկարն էլ ավելի է մոտենում։ Ավելի վաղ ՌԴ նախագահ Վլադիմիր Պուտինը, մեկնաբանելով Կիևին սպառված ուրանի արկեր մատակարարելու բրիտանական նախաձեռնությունը, ասել էր, որ Արևմուտքը որոշել է Ռուսաստանի դեմ մինչև վերջին ուկրաինացի կռվել ոչ թե խոսքով, այլ գործով։ ՌԴ նախագահն ընդգծել է, որ այժմ Ռուսաստանը հարկադրված կլինի պատշաճ կերպով արձագանքել այդ սպառնալիքին։
