«Սպուտնիկ V» պատվաստանյութը պաշտպանում է կորոնավիրուսի բոլոր շտամերից. Գինցբուրգ

«Սպուտնիկ V» պատվաստանյութը պաշտպանում է կորոնավիրուսի բոլոր տարբերակներից, այդ թվում՝ «դելտա» շտամից։ Այս մասին «ՌԻԱ Նովոստի»-ին հայտնել է Համալեայի անվան համաճարակաբանության եւ մանրէաբանության ազգային հետազոտական կենտրոնի տնօրեն Ալեքսանդր Գինցբուրգը։

Երկուշաբթի հայտնի է դարձել, որ «Դելտա» շտամի նոր AY.4.2 տարբերակով վարակման երեք դեպք է հայտնաբերվել Մոսկվայում եւ Մերձմոսկվայում:

««Սպուտնիկ V» պատվաստանյութն արդյունավետ է բոլոր տարբերակների դեմ, ոչ մի տարբերակ չի դարձել համաճարակային տեսանկյունից ավելի նշանակալի, քան նախնական տարբերակը»,-ասել է Գինցբուրգը՝ պատասխանելով այն հարցին, թե արդյոք «Սպուտնիկ V»-ն արդյունավետ կլինի դելտա շտամի նոր տարբերակի դեմ:

Նա նշել է, որ «դելտայի» նոր տարբերակները մշտապես հայտնվում են։

Ավելի վաղ բրիտանական առողջապահական գործակալությունը (UK Health Security Agency, UKHSA) հայտնել էր, որ AY․4.2 մուտացիան կարող է տարբերվել «դելտայի» համեմատ տարածման ավելի բարձր տեմպերով: