Հայաստանի արտաքին գործերի նախարար Արարատ Միրզոյանն աշխատանքային հանդիպում է ունեցել ՌԴ ԱԳ նախարար Սերգեյ Լավրովի հետ, հաղորդում է «Լուրերի դաշնային գործակալությունը»:
Հայ դիվանագետը հայտարարել է, որ Ադրբեջանն անտեսում է Լեռնային Ղարաբաղում ռազմական գործողությունների դադարեցման մասին եռակողմ պայմանագրի կետերի կատարումը:
Նրա խոսքով՝ Հարավային Կովկասում լարվածությունը պահպանվում է Ադրբեջանի ապակառուցողական քաղաքականության պատճառով, որը չի կատարում Լեռնային Ղարաբաղում ռազմական գործողությունների դադարեցման վերաբերյալ նոյեմբերի 9-ի եռակողմ հայտարարության կետերը:
«Մեր տարածաշրջանում կայունությունը մեր ռազմավարությունն է, և մենք պատրաստ ենք ակտիվ երկխոսության այդ ուղղությամբ։ Սակայն տարածաշրջանում պահպանվում է բավական լարված իրավիճակ, և դա նշանակալի մասով կանխորոշվում է Ադրբեջանի ապակառուցողական քաղաքականությամբ։ Ցանկանում եմ արձանագրել, որ Բաքուն չի կատարում իր իսկ ստանձնած պարտավորությունները Հայաստանի, Ռուսաստանի և Ադրբեջանի ղեկավարների՝ 2020 թվականի նոյեմբերի 9-ի եռակողմ հայտարարության վերաբերյալ, որը ձեռք է բերվել [ՌԴ նախագահ Վլադիմիր Պուտինի] անձնական ջանքերով», - ասել է նա։
Նա նաև նշել է Հայաստանի պատրաստակամությունը՝ խորացնելու հարաբերությունները Ռուսաստանի հետ, որը հանդիսանում է Երևանի հիմնական ռազմաքաղաքական դաշնակիցն ու տնտեսական գործընկերը։
Միրզոյանն ընդգծել է, որ սա իր առաջին արտասահմանյան այցն է որպես Հայաստանի արտաքին գործերի նախարար, ինչը զարմանալի չէ։
«Ռուսաստանը Հայաստանի ռազմաքաղաքական դաշնակիցն է և հիմնական տնտեսական գործընկերը։ Այդ կապակցությամբ ես կցանկանայի հաստատել հայկական կողմի պատրաստակամությունը՝ հետագայում ևս կառուցել իր հարաբերությունները ՌԴ-ի հետ՝ 1997 թվականի «Բարեկամության, համագործակցության և փոխադարձ օգնության մասին» պայմանագրի, «Դաշնակցային փոխգործակցության մասին» հռչակագրի հիման վրա», - նշել է Հայաստանի արտաքին քաղաքական գերատեսչության ղեկավարը, հաղորդում է «Սպուտնիկ»-ը:
Հարկ է նշել, որ Միրզոյանը Մոսկվա է ժամանել երկօրյա աշխատանքային այցով։ Սա նրա առաջին այցն է Ռուսաստան՝ որպես արտաքին քաղաքական գերատեսչության ղեկավար։ Բացի Լավրովի հետ շփումներից, դիվանագետը պատրաստվում է հանդիպել Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Ստանիսլավ Զասի հետ:
Ավելի վաղ հայտնի էր դարձել, որ Հայաստանի նախագահ Արմեն Սարգսյանը Միրզոյանին նշանակել է արտաքին գործերի նախարարի պաշտոնում: Հրամանագիրը ստորագրվել է օգոստոսի 19-ին։
