Մեզ ամուր նյարդեր է պետք, խաղաղության օրակարգն առաջ տանելու համար. Փաշինյան

Վարչապետ Նիկոլ Փաշինյանը կառավարության օգոստոսի 27-ի նիստում հայտարարել է, որ Կարմրաքար-Շուռնուխ, Գորիս-Որոտան ճանապարհահատվածների բացման շուրջ բանակցություններն այսօր դեռ չեն վերսկսվել:

Նա հույս է հայտնել, որ իրավիճակը րոպե առաջ կկարգավորվի։ «Ադրբեջանի պահվածքը վկայում է, որ նման միջադեպեր էլի կարող են լինել։ Մեզ ամուր նյարդեր է պետք, խաղաղության օրակարգն առաջ տանելու համար», - ասել է Փաշինյանը։

Այս առումով, նրա խոսքով, Էյվազլի և Չայզամլի (նկատի ունի Կարմրաքար-Շուռնուխ, Գորիս-Որոտան) հատվածում ճանապարհի բացումը կարևոր ազդակ կարող է լինել։

Անդրադառնալով միջպետական եւ հանրապետական նշանակության ճանապարհների նորոգման հարցին՝ Փաշինյանն ասաց. «Հիմնանորոգման մեր ծրագրերը, մասնավորապես, Սյունիքի մարզում մինչեւ տարեվերջ Տաթեւ-Աղվանի ճանապարհի հիմնանորոգումը պիտի ավարտվի։ Նախանշված մյուս հատվածների ճանապարհաշինական ծրագրերը նույնպես պիտի ավարտենք, համայնքների անխափան կապը մարզկենտրոնի, միջպետական եւ հանրապետական նշանակության ճանապարհների հետ ավելի որակյալ դարձնելու համար»։

Ըստ Փաշինյանի՝ որոշակի դրական հրապարակային ազդակներ կան Թուրքիայի կողմից. «Մենք այդ ազդակները կգնահատենք եւ դրական ազդակներին դրական ազդակով կպատասխանենք»։

VERELQ-ը հիշեցնում է, որ օգոստոսի 25-ի ժամը 23:00-ի սահմաններում ադրբեջանական կողմը փակել է Դավիթ Բեկ գյուղի (Շուռնուխ-Կարմրաքար հատված) միջպետական ճանապարհը, իսկ քաղաքացիական մեքենաների տեղաշարժը դադարեցվել է: Հաջորդ օրն ադրբեջանական զինված ուժերը փակել են նաև Գորիսից Որոտան տանող ճանապարհը։