Կրեմլում մեկնաբանել են Հայաստանում արտահերթ ընտրությունների արդյունքները

Կրեմլը տեսնում է, որ Հայաստանում տեղի ունեցած արտահերթ խորհրդարանական ընտրություններում Նիկոլ Փաշինյանի կուսակցությունը համոզիչ հաղթանակ է տարել և շնորհավորում է հայ ժողովրդին ընտրության կապակցությամբ: Այս մասին լրագրողներին ասել է ՌԴ նախագահի խոսմալ Դմիտրի Պեսկովը, փոխանցում է «ՌԻԱ Նովոստի»-ն:

«Մենք շատ ուշադիր հետևում ենք Երևանից ստացված տեղեկատվությանը: Մենք ողջունում ենք Հայաստանի Կենտրոնական ընտրական հանձնաժողովից ստացվող տեղեկությունները, որ այս ընտրությունները կայացած են: Եվ, իհարկե, տեսնում ենք, որ Փաշինյանի կուսակցությունը համոզիչ հաղթանակ տարավ: Մենք շնորհավորում ենք հայ ժողովրդին իր ընտրության կապակցությամբ», - պատասխանել է Պեսկովը հարցին, թե ինչպես է գնահատում Մոսկվան Հայաստանում ընտրությունների արդյունքները:

Հայաստանը, ինչպես նշել է ՌԴ նախագահի խոսնակը, Ռուսաստանի ամենամոտ դաշնակիցն է և նրա գործընկերը:

«Իհարկե, մենք կցանկանայինք, որ հայ ժողովրդի այս ընտրությունն օգներ հաղթահարել այն դժվարությունները, որոնք այժմ առկա են երկրում և դուրս գալ կայուն զարգացման հետագիծ, այդ թվում` եռակողմ համաձայնագրերի իրականացման միջոցով, որոնք ձեռք են բերվել և ստորագրվել են ուղղակիորեն Ռուսաստանի նախագահի մասնակցությամբ», - հավելել է Պեսկովը: