«Պատիվ ունեմ» դաշինքը հավանական է համարում կոալիցիան «Հայաստան» դաշինքի հետ. Բաբայան

«Պատիվ ունեմ» դաշինքը իրական է համարում «Հայաստան» դաշինքի հետ կոալիցիայի ստեղծումը: Այս մասին ասուլիսում հայտարարեց «Պատիվ ունեմ» դաշինքի ներկայացուցիչ Արսեն Բաբայանը:

«Ամենակարևորն այս իշխանության հեռացումն է»,- շեշտեց նա:

Բաբայանի խոսքով, իշխանություններին հեռացնելու համար իրենք դիմելու են բոլոր տրամաբանված քայլերին և կոալիցիայի ստեղծումը դրանցից մեկն է:   

«Փաշինյանի հայտարարությունները պարունակում են հանցանքի նշաններ, սակայն գլխավոր դատախազությունն անգործության է մատնված: Նա հասկանում է, որ պարտվել է, այդ իսկ պատճառով պատրաստ է ամեն ինչի: Նա ուժով վերցրել է իշխանությունը, իսկ մուրճը նրա հոգեկան անհավասարակշռության  դրսևորումն է, ինչի մասին խոսում են նաև նրա թիմակիցները»,- ասաց Բաբայանը:

Միևնույն ժամանակ Արսեն Բաբայանը հույս հայտնեց, որ իրավապահները, այդուհանդերձ, թույլ չեն տա Փաշինյանին կրկին հեղաշրջման ճանապարհով բռնազավթել իշխանությունը: