"Հորդող ներդրումների փուչիկն" ըստ Սուրեն Պարսյանի

Եթե Հայաստանում հորդող ներդրումներ կան, ապա ինչո՞ւ էր վերջին ամիսների ընթացքում կենտրոնական բանկը դրամի փոխարժեքը կայունացնելու համար դոլարային խոշոր ներարկումներ կատարում տնտեսության մեջ՝ փոշիացնելով մեր արտարժութային պահուստները։ Նման հարցադրում է անում տնտեսագետ Սուրեն Պարսյանը:

"Ակնհայտ է, որ մեծածավալ ներդրումների առկայության պարագայում դրամի փոխարժեքն արհեստական և պարբերաբար կայունացնելու կարիք չէր ունենար։

Իսկ եթե կառավարությունը կարծում է, որ պետական պարտքն ավելացնելու հաշվին, խոշոր բիզնեսին գումարներ վերադարձնելով (զիջելով)՝ ներդրումները կաճեն, ապա նրանք ինքնախաբեությամբ են զբաղված",- գրել է ՀՅԴ Բյուրոյի տնտեսական հետազոտությունների գրասենյակի պատասխանատուն Facebook-ի իր էջում: 

VERELQ-ը հիշեցնում է, որ նմանատիպ հայտարարություն այսօր արել էր ՀՀ էկոնոմիկայի նախարար Վահան Քերոբյանը.

"Երկնիշ տնտեսական աճն իհարկե լինելու է, Հայաստանն արդեն շինհրապարակ է, գյուղատնտեսությունը վայելում է մասշտաբային օժանդակություն, ներդրումները հորդում են, աշխատատեղերն ավելանում",- մասնավորապես գրել էր նա: