Ռոբերտ Քոչարյանի եւ մյուսների գործով դատական նիստը հետաձգվեց մինչեւ ապրիլի 2-ը

Այսօր՝ մարտի 30-ին, Երեւանի ընդհանուր իրավասության դատարանը, դատավոր Աննա Դանիբեկյանի նախագահությամբ, հետաձգել է «Մարտի 1»-ի գործով դատական նիստը՝ մեղադրող կողմի բացակայության պատճառով:

Դանիբեկյանը չի կատարել ՀՀ Սահմանադրական դատարանի որոշումը, որը ենթադրում էր ՀՀ նախկին նախագահ Ռոբերտ Քոչարյանի նկատմամբ քրեական հետապնդման դադարեցում: Նրա խոսքով, քանի որ այսօրվա նիստին բացակայում էր մեղադրող կողմը, դատարանն անհնար համարեց քրեական հետապնդումը դադարեցնելու հարցի քննարկումը:

Հաջորդ դատական նիստը նշանակված է ապրիլի 2-ին։

Մինչ այդ հրապարակվեց նաև մեղադրող դատախազ Գևորգ Բաղդասարյանի դիմումը.

«Մարտի 29-ի երեկոյան հրապարակվել է ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի և դիմումների հիման վրա ՀՀ քրեական օրենսգրքի 300.1-րդ հոդվածի սահմանադրության համապատասխանության հարցը որոշելու վերաբերյալ գործով դատական ակտը:

Նկատի ունենալով, որ առկա է նշված որոշման հիման վրա դատարանի կողմից կիրառման ենթակա ՀՀ քրեական դատավարության օրենսգրքի նորմի սահմանադրության համապատասխանության խնդիր և այդ կապակցությամբ դատարան ներկայացնելու համար նախապատրաստվում է ծավալուն միջնորդություն, որը մինչև դատական նիստը կազմել հնարավոր չէ, խնդրում եմ նշանակված դատական նիստը հետաձգել և նշանակել ըստ նախապես որոշված ժամանակացույցի 2021 ապրիլի 6-ին»:

VERELQ-ը հիշեցնում է, որ մարտի 26-ին ՍԴ-ն ընդունեց, որ ՀՀ քրեական օրենսգրքի 300.1-րդ հոդվածը, որով ՀՀ երկրորդ նախագահ Ռոբերտ Քոչարյանը մեղադրվում է «սահմանադրական կարգը տապալելու» մեջ, չի համապատասխանում Սահմանադրությանը:

Հայաստանի հատուկ քննչական ծառայությունը 2018 թվականի հուլիսի 26-ին Ռոբերտ Քոչարյանին մեղադրանք է առաջադրել 2008 թվականի մարտի 1-2-ին տեղի ունեցած բողոքի ակցիաները ցրելու վերաբերյալ քրեական գործի շրջանակներում սահմանադրական կարգը տապալելու համար:

Հանրապետության նախկին ղեկավարին մեղսագրվում է նաեւ առանձնապես խոշոր չափերով կաշառք ստանալը: Ռոբերտ Քոչարյանը մեղադրանքները շինծու քաղաքական հետապնդում է համարում։