Վերջին ամիսներին հանրապետությունում իրականացվող տնտեսական քաղաքականությունը, իմ խորին համոզմամբ, աչքի է ընկնում իր ցածր արդյունավետությամբ, չկա երկրում կուտակված հիմնախնդիրների լուծման տեսլական, բացակայում է տնտեսական զարգացման նպատակային ու համալիր ռազմավարական ծրագիրը։ Նշվածների ուղղակի հետևանք պետք է համարել տնտեսության ստագնացիոն վիճակն ու սպառողական ապրանքների գների նկատվող տատանումները։ Այս մասին VERELQ-ի հետ զրույցում ասաց ԱԺ նախկին պատգամավոր, գնտեսագետ Վարդան Բոստանջյան` անդրադառնալով այն հարցին, որ հանրապետությունում գրանցվել է բավականին բարձր գնաճ։
«Մասնավորապես, նախորդ տարվա հունվարի համեմատ հանրապետությունում գրանցվել է 4․5 տոկոս գնաճ, որն, ըստ էության, իրենից ներկայացնում է միջինացված ցուցանիշ։ Ընդ որում, հատկանշական է այն, որ սննդամթերքի և ոչ ալկոհոլային խմիչքների գնաճը կազմել է համեմատաբար ավելի ցածր՝ 6,4 տոկոս այլ ապրանքատեսակների՝ հիմնականում ոչ առաջին անհրաժեշտության ապրանքների գնաճի համեմատությամբ»,֊ - նշեց նա։
Հարցին, թե այս պարագայում Կենտրոնաբակն բանկն ի՞նչ քաղաքականություն պետք է իրականացնի, մեր զրուցակիցն ասաց, որ սպառողական ապրանքների գների վրա ազդում են տարբեր գործոններ, որոնցում հատկապես առարկայական են տնտեսության վիճակը և արտաքին շուկաներում տեղի ունեցող ոչ բարենպաստ զարգացումները։ Կենտրոնական բանկը, որի հիմնական նպատակներն են հանրապետությունում գների և ֆինանսական կայունության ապահովումը, իր տրամադրության տակ եղած գործիքակազմով որոշակի քայլեր արդեն իսկ իրականացրել է ոչ ցանկալի սցենարների կանխման ուղղությամբ։
«Խոսքը գնային ռիսկերի զսպման և ֆինանսական կայունության ապահովման նպատակով դեռևս անցած տարվա դեկտեմբերին 4․25 տոկոսից վերաֆինանսավորման տոկոսադրույքը դարձեց 5․25 տոկոս։ Կարող ենք ասել, որ պատերազմի և համավարակի հետևանքով ստեղծված բարդ իրավիճակում Կենտրոնական բանկին հիմնականում հաջողվեց ՀՀ ֆինանսական համակարգը զերծ պահել ցնցումներից», - նշեց նա։
Վարդան Բոստանջյանի կարծիքով, այլ պետական ինստիտուտների համեմատությամբ ունենալով կայացվածության և զարգացվածության առավել բարձր մակարդակ, Կենտրոնական բանկը, շատ դեպքերում իր գործողություններում օժտված չէ բացարձակ ազատությամբ և ստիպված է հաշվի առնել տնտեսությունում տեղի ունեցող ոչ ցանկալի զարգացումները։ «Վերջիններս, անխուսափելիորեն իրենց ազդեցությունն են ունենում ֆինանսական համակարգի և գնաճի մակարդակի վրա և, այս տեսանկյունից, իրավիճակի հաղթահարումը պետք է տեղի ունենա ընդհանուր տնտեսական քաղաքականության բարելավման և դրա արդյունավետության բարձրացման միջոցով», - հավելեց նա։
