Ռուս խաղաղապահներ տեղափոխող հերթական ինքնաթիռները մեկնել են Ղարաբաղ

Ուլյանովսկ շրջանից ռուս խաղաղապահներ տեղափոխող 11-րդ և 12-րդ ինքնաթիռները մեկնել են Լեռնային Ղարաբաղ: Այս մասին գրում է ՌԻԱ Նովոստի-ն՝ հղում անելով ՌԴ ՊՆ-ին:  

«Ռուս խաղաղապահներ տեղափոխող տասնմեկերորդ և տասներկուերորդ ԻԼ-76 ռազմական տրանսպորտային ինքնաթիռները թռիչք են իրականացրել «Ուլյանովսկ-Վոստոչնի» օդանավակայանից: Օդանավում խաղաղապահ ստորաբաժանման անձնակազմ, նյութական միջոցներ և զրահամեքենաներ են»,- ասված է հաղորդագրության մեջ:

Ավելի վաղ հայտնի է դարձել, որ Ղարաբաղում խաղաղապահ առաքելության իրականացման համար կմեկնի 1960 ռուս զինծառայող, ինչպես նաև կտեղակայվի 90 զրահափոխադրիչ ու 380 միավոր ավտոմոբիլային և հատուկ տեխնիկա։