ՍԴ ճգնաժամը հանգուցալուծվելու է ավելի արագ և առանց հանրաքվեի. Ռուբեն Ռուբինյան

Հայաստանում Սահմանադրական դատարանի հետ կապված ճգնաժամը հանգուցալուծվելու է հնարավոր այլընտրանքային ուղիներով, չի բացառվում, որ առավել արագ և առանց հանրաքվեի: Այդ մասին հայտարարել է «Իմ քայլը» խմբակցության պատգամավոր Ռուբեն Ռուբինյանը։

Կորոնավիրուսի համաճարակը, ինչպես հայտնի է, արագ չի վերանալու, Ֆեկսբուքյան իր էջու գրել է Ռուբինյանը, որի կարծիքով, ՍԴ ճգնաժամի լուծմանն ուղղված հանրաքվեն չի կարող կայանալ, քանի դեռ համաճարակը չի վերացել։

Սակայն, մյուս կողմից, նշում է պատգամավորը, չեն կարող այսքան երկար սպասել և առաջ շարժվել բարեփոխումների և արդարության հաստատման «մեր օրակարգով՝ առանց ՍԴ ճգնաժամի հանգուցալուծման»։ «Հետևաբար, ուզում եմ տեղեկացնել, որ, հաշվի առնելով, որ համաճարակը կարող է տևել բավականին երկար, մենք ուղիներ ենք փնտրում ՍԴ ճգնաժամը այլ ճանապարհով և ավելի արագ լուծելու ուղղությամբ», - նկատում է նա։

«Հենց այս համատեքստում օրերս արդարադատության նախարար Ռուստամ Բադասյանը հարցեր է ուղղել Վենետիկի հանձնաժողովին։ Այս հարցերը վերաբերում են 2015 թվականի Սահմանադրությամբ նախատեսված, սակայն փաստացի չիրականացված Սահմանադրական դատարանի ձևավորման մոդելն արագ կյանքի կոչելուն, Սահմանադրության փոփոխությունների նախագծի վերաբերյալ Սահմանադրական դատարանի որոշման շրջանակների սահմանմանը, ինչպես նաև նախապես նշանակված և համավարակի պատճառով չանցկացված հանրաքվեն անհրաժեշտության դեպքում չեղարկելու՝ Ազգային ժողովի լիազորությանը։

Այսպիսով, թեև ՍԴ ճգնաժամի հանգուցալուծման հնարավոր այլընտրանքային ուղին իր ծավալով կարող է նույնական չլինել նախնական ուղու հետ, բայց այն, միևնույն է, հանգուցալուծվելու է, և չի բացառվում, որ ավելի արագ և առանց հանրաքվեի», - հայտարարել է նա։

ՀՀ-ում ապրիլի 5-ին նշանակված Սահմանադրական հանարքվեն չեղարկվել էր կորոնավիրուսի պատճառով երկրում մարտի 16-ից հայտարարված արտակարգ դրության և երկրում վարակի տարածումը կանխելու պատճառով։