Ուսանողական վարկեր ստանալու պայմանները հեշտացվեցին

Կառավարությունը դյուրացրեց ուսանողական վարկեր ստանալու պայմանները՝ հակաճգնաժամային 14-րդ միջոցառման շրջանակում:

Կենտրոնական բանկի նախագահ Արթուր Ջավադյանի խոսքով, ներկայումս Հաայաստանում սպասարկվում է 11 150 ուսանողական վարկ:

Ծրագրով նախատեսվում է, որ 80 տոկոսից բարձր ՄՕԳ ունեցող ուսանողները վարկ կստանան զրո տոկոսով, նաև գործող վարկերը դառնում են զրո տոկոսով: 80-ից ցածր ՄՈԳ ունեցողների համար վարկի տոկոսը իջնում է եւ դառնում 4 տոկոս: Բացի այդ, նոտարի կողմից հաստատված երաշխավորություններ ծնողների կողմից այլեւս պետք չեն. «Սա նշանակում է, որ վարկերի ստացման ընթացակարգն էլ հեշտացվել է, մենք հասանելի ենք դարձնում վարկերը բոլոր ուսանողների համար և ակնկալում ենք, որ շատ ուսանողներ կդիմեն վարկավորման համար»,- ասաց Ջավադյանը:

Վարչապետ Նիկոլ Փաշինյանն էլ հիշեցրեց, որ ըստ ծրագրի՝ ուսման տարիներին ուսանողները մայր գումար չեն վճարում, այսինքն՝ 80-ից բարձր ՄՈԳ ունեցողներն ընդհանրապես որևէ վճարում չեն անի և կսկսեն այն անել միայն ավարտելուց հետո:

«Փաստորեն, 100 տոկոսով կատարվում է մեր քաղաքական այն հանձնառությունը, որ բարձր առաջադիմություն ունեցող ոչ մի ուսանող ուսման վարձ չվճարելու պատճառով չի հեռացվի բուհից»,- շեշտեց վարչապետը:

Կրթության, գիտության, մշակույթի և սպորտի նախարար Արայիկ Հարությունյանն էլ տեղեկացրեց, որ այս փոփոխությունը վերաբերում է մայիսի 1-ից դեկտեմբերի 31-ն ընկած ժամանակահատվածին, որից հետո կգործեն հին ցուցանիշները: