Յոթ չափենք, մեկ կտրենք. Նիկոլ Փաշինյանը՝ գումարները ծախսելու մասին

2020 թվականի առաջին եռամսյակի արդյունքներով՝ առաջին խոշոր հարկ վճարողների կողմից վճարված հարկերի մեծությունը կազմել է 246 միլիարդ դրամ։ 2019 թվականի առաջին եռամսյակի համեմատ՝ արձանագրվել է 11,3 տոկոս աճ, իսկ 2018 թվականի նկատմամբ աճը կազմել է 37,4 տոկոս։ Այս մասին կառավարության այսօրվա նիստում հայտարարեց ՀՀ վարչապետ Նիկոլ Փաշինյանը:

Նրա խոսքով, խոշոր 100 հարկատուների կողմից վճարվել է 151 միլիարդ դրամ հարկ, որը 16 միլիարդ դրամով ավելի է նախորդ տարվա համապատասխան ցուցանիշից, իսկ 2018 թվականի մակարդակը գերազանցում է մոտ 40 միլիարդ դրամով: 

«Այս թվերը շատ խոսուն են։ Այս երկու ցուցանիշները վկայում են, որ մենք բազմաթիվ մենաշնորհային, կոռուպցիոն, արտոնյալ մեխանիզմներ ուղղակի ոչնչացրել ենք, բայց մենք, այնուամենայնիվ, գումարները ծախսելիս պետք է յոթ չափենք, մեկ կտրենք՝ հասկանալու համար, թե արդյոք գումարը ճիշտ տեղում ենք ներդնում», - ասաց վարչապետը։

Վարչապետը նշեց , որ չլուծված հարցերն այնքան շատ են, որ երբեմն պետք է ավելի հասցեական ու ավելի կարճ որոշում կայացվի՝ հետագայի համար ավելի ռազմավարական լուծումների միտմամբ:

Փաշինյանը նաև ասաց, որ կառավարությանը մեղադրում են միջոցներ խնայելու համար։ Ըստ վարչապետի՝ դա շատ տարօրինակ մեղադրանք է, քանի որ մեղադրում են ոչ թե միջոցները անարդյունավետ ծախսելու, այլ դրանք խնայելու համար: Բայց ինքը ուրախ է դրա համար: