Ոսկու պաշարի վաճառքը տրագեդիա չէ. ԿԲ նախագահի թեկնածու

Ժամանակին Հայաստանի ոսկու պաշարի վաճառքի վերաբերյալ կայացած որոշման մեջ ոչ տրագեդիա կա, ոչ էլ չարամտություն: Այս մասին Ազգաին ժողովում ապրիլի 16-ին պատասխանելով պատգամավորների հարցին՝ ասաց ԿԲ նախագահի թեկնածու Մարտին Գալստյանը:

Հարցն ուղղեց «Իմ քայլը» խմբակցության պատգամավոր Արման Եղոյանը՝ նշելով Ֆորսմաժորային իրավիճակներում ոսկու պաշարներ ունենալու կարևորությունը:

«2003 թվականի վերջին որոշում կայացվեց վաճառել 1,4 տոննա ոսկու պահուստը և հետաքրքրվեց: Արդյո՞ք չեք կարծում, որ սև օրվա համար արժի ունենալ ոսկու կուտակված որոշակի պաշար: Արյդո՞ք ճիշտ չէր լինի այսօրվա համար որոշակի ոսկու պաշար ունենար ԿԲ-ն, որ այս ֆորսմաժորային իրավիճակում օգտագործեր այդ պաշարը», - հարցրեց պատգամավորը:

Մարտին Գալստյանն ևս հիշեցրեց, որ ոսկին այդ ժամանակ իրացվել է ու դրա տեղը վերցրել են եվրո և բրիտանական ֆունտ:

«Բրիտանական ֆունտն այդ ժամանակ ապահովում էր 5 տոկոս տարեկան եկամտաբերություն: Այն պարագայում երբ ոսկին՝ զրո: Ոսկին որպես ֆորսմաժորային գործիք դժվար է պատկերացնելը», - նշեց ԿԲ նախագահի թեկնածուն՝ հավելելով, որ ոսկու միջոցով ֆինանսական շուկայում ինտերվենցիա հնարավոր չէ անել:

«Ավելի շատ կարող ենք անել ԱՄՆ դոլարով, քան ոսկով, այնպես որ ոսկին իրացվելիության խնդիր չի լուծում: Այդ ժամանակ մի ակտիվը փոխարինվել է մեկ այլ ակտիվով, ուղղակի այդտեղ զուտ զգայական ու նուրբ լարերի էլեմենտ կա. մենք պատկերացնում ենք, որ եթե աշխարհը, օրինակ, փլվի ոսկին մնալու է. այդ թեզը վիճելի թեզ է»,- ընդգծեց նա: