Փաշինյանը դեռ պետք է կարողանա հաղթել սահմանադրական հանրաքվեում. Մարկեդոնով

Հայաստանում թավշյա հեղափոխության երկրորդ փուլը, որը վարչապետ Նիկոլ Փաշինյանը ազդարարել էր անցյալ տարի, մտնում է վերջնական փուլ: Այս մասին հայտարարել է ռուսաստանցի քաղաքագետ Սերգեյ Մարկեդոնովը՝ Bunin & Co տելեգրամ ալիքին մեկնաբանելով ՀՀ-ում Սահմանադրական փոփոխությունների հանրաքվեի շուրջ ստեղծված իրավիճակը:

Միևնույն ժամանակ նա հիշեցրել է, որ վարչապետը թավշյա հեղափոխության երկրորդ փուլ ասելով նկատի ունի դատական իշխանության մաքրումը:

«Եվ ահա հիմա հանրապետությունը պատրաստվում է համաժողովրդական հանրաքվեին, որը կկայանա ապրիլի 5-ին: Ֆորմալ առումով հարցերը, որոնք ներկայացվել են քվեարկողին, ՍԴ դատավորների լիազորությունների վերաբերյալ են: Բայց փաստացի խոսքն այն մասին է, որ ՍԴ անդամների մեծ մասը կարող է զրկվել իր լիազորություններից: Պատճառն այն է, որ նրանք խաղում են խաղի հին կանոններով», -նշել է նա

Մարկեդոնովը կարծում է, որ Փաշինյանը այդքան էլ չի ջանում թաքցնել, որ այս պրոեկտի հիմնական նպատակը ՍԴ նախագահ Հրայր Թովմասյանի հրաժարականն է:

«Հայաստանի կառավարության ղեկավարը հակված չէ գործարքների կամ փոխզիջումների գնալ «հին աշխարհի» ներկայացուցիչների հետ: Այս ճանապարհին նա վերահսկողության տակ վերցրեց ԱԺ-ն ու Երևանի ավագանին: Հրայր Թովմասյանի և դատարանի դատավորների մեծամասնության հրաժարականի դեպքում նա վերահսկողություն կստանա նաև դատական համարակգի վրա: Հարց է առաջանում՝ ի՞նչ կլինի այն դեպքում, եթե պետության բոլոր ինստիտուտները լինեն իր ձեռքում: Թեև՝ հանրաքվեում դեռ պետք է հաղթել», - հավելել է Մարկեդոնովը: