Վրաստանի հետ ՌԴ ավիահաղորդակցության վերականգնումը շուտափույթ լուծում է պահանջում. Կոսաչով

Վրաստանի եւ Ռուսաստանի միջեւ այցագրային ռեժիմի մեղմացման հարցերը, ընդհուպ մինչեւ դրա չեղարկումը, ինչպես նաեւ այդ երկրի հետ ավիահաղորդակցության վերականգնման հարցերը, շուտափույթ լուծում են պահանջում: Այդ մասին Դաշնության խորհրդի միջազգային գործերի կոմիտեի ղեկավար Կոնստանտին Կոսաչովը հայտարարել է «Միասնական Վրաստան-Ժողովրդավարական շարժում» ընդդիմադիր կուսակցության առաջնորդ Նինո Բուրջանաձեի հետ հանդիպմանը:

«Կան մի քանի գործնական հարցեր, որոնք, մեր կարծիքով, պահանջում են արագ լուծում: Դա ե՛ւ ռուսական կողմի հետ այցագրային ընթացակարգերի մեղմացումն է ընդհուպ մինչեւ այցագրերի չեղարկումը, դա ե՛ւ ավիահաղորդակցության վերականգնումն է, դա ե՛ւ այն հարցերի լուծումն է, որոնք կապված են մի շարք ապրանքների մատակարարման սակագնային սահմանափակումների հետ: Ընդհանուր առմամբ, կա կոնկրետ օրակարգ, որը քննարկվում է ամենատարբեր մակարդակներով, տարբեր ձեւաչափերով»,- հավելել է Կոսաչովը: