Կենդանաբանական այգու տնօրենը վերջապես հրաժարական տվեց՝ փոխքաղաքապետի առաջարկով

Կենդանաբանական այգու տնօրեն Ռուբեն Խաչատրյանը վերջապես հայտարարեց իր  հրաժարականի մասին: Ինչպես հետևում է նրա Facebook-յան գրառումից, որոշումը կայացրել է Երևանի փոխքաղաքապետ Տիգրան Վիրաբյանի առաջարկով:

Նա իր գրառման մեջ մասնավորապես գրել է. «Երևանի կենդանաբանական այգու շուրջ վերջին օրերի իրադարձությունները, չհանգստացող կրքերն ու թափառող շների հարձակումները այգում պահվող կենդանիների վրա հաշվի առնելով, չբացառելով դրանում առկա մարդկային գործոնը, սակյան չխախտելով նաև անմեղության կանխավարկածը, որոշում եմ կայացրել դադարեցնել Երևանի կենդանաբանական այգու տնօրենի լիազորությունները:

Պաշտոնավարմանս 8 տարիների ընթացքում Երևանի կենդանաբանական այգին գրանցել է տեսանելի առաջընթաց, վերանորոգվել, բարեկարգվել և կառուցվել են եվրոպական չափանիշներին համապատասխանող ազատավանդակներ, ներմուծվել Երևանում երբևէ չցուցադրված կենդանիներ, բարձրացվել կենդանաբուժական ծառայությունների ստանդարտը, այգին դարձել է Եվրոպական կենդանաբանական այգիների և ակվարիումների միջազգային ասոցիացայի թեկնածու անդամ:

Թեպետ որոշումը կայացրել եմ Երևանի փոխքաղաքապետ Տիգրան Վիրաբյանի առաջարկով, լիահույս եմ, որ լիազորություններիս դադարեցման արդյունքում այլևս կավարտվի կենդանիների անկումների շարանը (այդ թվում՝ թափառող շների հարձակումները), քանի որ աշխատանքիս թիրախում մշտապես ունեցել եմ կենդանիների բարեկեցությունն ու հանրային անվտանգությունը:

Պաշտոնապես հայտարարում եմ, որ մշտապես եղել եմ, և շարունակելու եմ լինել Երևանի կենդանաբանական այգու կողքին՝ որպես աջակից, ինչպես նաև քաղաքային իշխանությունների թիմակից և ընկեր՝ մշտապես աջակցելով Այգու բարեկարգման որդեգրած ուղին առաջ տանելու հարցում:

Շնորհակալ եմ քաղաքային իշխանություններին՝ ցուցաբերած վստահության համար, և է՛լ ավելի շնորհակալ իմ թիմին՝ իր աշխատանքային պարտականությունները մշտապես գերակատարելու և Կենդանաբանական այգու թռիչքաձև զարգացման ուղին որդեգրելու համար»,- գրել է նա:

Հիշեցնենք, նախօրեին հայտնի դարձավ, որ թափառող շները հարձակվել ու այգու երեք կենգուրուի էին կերել։ Կենդանիների վրա հարձակում գործած շները, ըստ այգու ղեկավարության, տարածքում թափառող շներն են։ Իսկ այսօր առավոտյան թափառող շների ոհմակը հարձակվել ու սատկացրել է Երևանի կենդանաբանական այգու 3 մուֆլոնի։