Սահմանադրական դատարանը Մարտի 1-ի գործով մեղադրյալ ՀՀ երկրորդ նախագահ Ռոբերտ Քոչարյանի խափանման միջոցի հիմքերին վերաբերող հոդվածը ճանաչեց հակասահմանդրական: ՍԴ-ն այսօր հրապարակեց Քոչարյանի գործով որոշումը:
ՀՀ սահմանադրական դատարանը դռնբաց նիստում գրավոր ընթացակարգով քննելով ՀՀ երկրորդ նախագահ Ռոբերտ Քոչարյանի դիմումի հիման վրա` ՀՀ քրեական դատավարության օրենսգրքի 35-րդ հոդվածի և 135-րդ հոդվածի 2-րդ մասի` Ռոբերտ Քոչարյանի նկատմամբ խափանման միջոց կիրառելու հիմքերի և քրեական գործի վարույթը կամ քրեական հետապնդումը բացառող հանգամանքների սահմանադրականության հարցը, որոշեց.
1. ՀՀ քրեական դատավարության օրենսգրքի 35-րդ հոդվածը Սահմանադրության ուժով, հատուկ պաշտպանությամբ օժտված պաշտոնատար անձանց գործառութային անձեռնմխելիությունը քրեական գործի վարույթը կամ քրեական հետապնդումը բացառող հանգամանքների թվի չնախատեսելու մասով ճանաչել Սահմանադրության 27–րդ հոդվածի 1–ին մասի 4–րդ կետին, 61–րդ հոդվածի 1–ին մասին և 63–րդ հոդվածի 1–ին մասին և 78–րդ հոդվածներին հակասող և անվավեր։
2. ՀՀ քրեական դատավարության օրենսգրքի 135-րդ հոդվածի 2-րդ–րդ մասը համապատասխանում է Սահմանադրությանը։
Քոչարյանի գործով ներկայացուցիչ Արամ Վարդեւանյանը որոշման հրապարակումից հետո լրագրողների հետ զրույցում մեկնաբանեց, որ ՍԴ որոշման համաձայն՝ եթե Քրդատ օրենսգրքի 35-րդ հոդվածը հակասահմանադրական է: Իսկ դա, նրա խոսքով, նշանակում է, որ խախտվել Քոչարյանի՝ Սահմանադրության 27-րդ հոդվածով երաշխավորված անձնական ազատության իրավունքը։
Վարդեւանյանն անդրադարձավ ՍԴ որոշման երկրորդ կետին, ըստ որի՝ Քրդատ օրենսգրքի 135-րդ հոդվածը հակասահմանադրական չէ, իսկ այս հոդվածը կարգավորում է խափանման միջոց կիրառելու հիմքերը։ Վարդեւանյանի մեկնաբանությամբ՝ 135-րդ եւ 35-րդ հոդվածներն իրար լրացնող են, եւ առանձին չեն կարող կիրառվել․ «Սա նշանակում է, որ Քոչարյանի կալանավորումը չի կարող լինել իրավաչափ»,- ընդգծեց Վարդեւանյանը։
Ինչ վերաբերում է Քոչարյանի նկատմամբ քրեական հետապնդումը դադարեցնելու հիմքերին՝ վերջինիս ներկայացուցիչն ասաց, որ այդ հարցադրմանը կկարողանա պատասխանել ՍԴ որոշմանը ծանոթանալուց հետո։
Արամ Վարդեւանյանը նշեց, որ ՍԴ որոշումը պարտադիր է բոլորի համար, եւ դրա չկատարելը քրեորեն հետապնդելի արարք է․ «Խափանման միջոցը վերանայելու հնարավորությունը 2 տեսանկյունից կարող է լինել, կարող է լինել ե՛ւ քրեակատարողական ծառայության կողմից, ե՛ւ վարույթն իրականացնող մարմնի՝ առաջին ատյանի դատարանի կողմից»,- հավելեց Վարդեւանյանը։
Դատարանի որոշումը վերջնական է և ուժի մեջ է մտնում հրապարակման պահից։
Հիշեցնենք որ Ռոբերտ Քոչարյանը մեղադրվում է ՀՀ քրեական օրենսգրքի 300.1-րդ հոդվածի 1-ին մասով և 311-րդ հոդվածի 4-րդ մասի 2-րդ կետով` ՀՀ սահմանադրական կարգը տապալելու և առանձնապես խոշոր չափերով կաշառք ստանալու մեջ: Երկրորդ նախագահը կալանավորվել է երեք անգամ։
Քոչարյանը երրորդ անգամ կալանավորվել է հունիսի 25-ին Վերաքննիչ քրեական դատարանի դատավոր Արմեն Դանիելյանի որոշմամբ։ Վերաքննիչի որոշմամբ Քոչարյանի և մյուսների գործը բեկանվել է և ուղարկվել առաջին ատյանի դատարան՝ նոր քննության։ Գործը մակագրվել է դատավոր Աննա Դանիբեկյանին։
