Պարզեցված վարույթի համակարգը բարելավելով կբեռնաթափվեն դատարանները

Կառավարությունն առաջարկում է 2018թ. փետրվարին քաղաքացիական դատավարությունում ներդրված պարզեցված վարույթի համակարգը բարելավելով բեռնաթափել դատարանները:

ՀՀ արդարադատության նախարար Արտակ Զեյնալյանը գործադիրի այսօրվա նիստում հայտարարեց, որ դատական վիճակագրության ուսումնասիրությունը վկայում է, որ 2013-2017թթ. ընկած ժամանակահատվածում քաղաքացիական գործերի թիվը գրանցել է աննախադեպ աճ` 48540-ից հասնելով 137003-ի: Նա հիշեցրեց, որ այս հանգամանքի հաշվառմամբ 2018թ. փետրվարին ներդրվեց պարզեցված վարույթ, որը հնարավորություն է տալիս գործը քննել հեշտացված ընթացակարգի միջոցով:

«Ներկայացվող նախագծով նախատեսվում է անցում կատարել քաղաքացիական դատավարությունում պարզեցված վարույթի առավել դյուրին ընթացակարգի»,- ասաց նախարարը:

Այն ենթադրում է, որ բռնագանձման պահանջի՝ նվազագույն աշխատավարձի երկուհազարապատիկը չգերազանցելու հարցը որոշելիս հիմք է ընդունվում հայցադիմումը ներկայացնելու օրվա դրությամբ ներկայացված պահանջի չափը: Բացի այս, կարգավորվել է արտարժույթով բռնագանձման վերաբերյալ պահանջ ներկայացվելու դեպքում այդ պահանջի՝ ՀՀ դրամի հետ համարժեքությունը որոշելու հարցը: Նախատեսվել է գործը պարզեցված վարույթի կարգով քննելու հարցը, որպես կանոն, հայցադիմումը վարույթ ընդունելու որոշմամբ լուծելու հնարավորություն:

Բացի այդ, ընդլայնվել են պարզեցված վարույթի կարգով քննվող գործերի շրջանակը՝ ներառելով նաև այն դեպքերը, երբ մինչև գործով ապացուցման պարտականությունը բաշխելու մասին դատարանի որոշումը կայացնելը պատասխանողը չի առարկել հայցի դեմ, չի ներկայացրել հակընդդեմ հայց կամ հայցի առարկայի փոփոխության արդյունքում հայցապահանջը չի գերազանցում նվազագույն աշխատավարձի երկուհազարապատիկը: Սահմանվել է պարզեցված վարույթ կիրառելու վերաբերյալ որոշման հետ մեկտեղ գործին մասնակցող անձանց նրանց իրավունքների և պարտականությունների վերաբերյալ գրավոր պարզաբանում ուղարկելու պահանջ: Նախատեսվել է պարզեցված վարույթով դատական նիստ հրավիրելու հնարավորություն:

Մանրամասնվել են պարզեցված վարույթի կարգով գործի քննության արդյունքում կայացվող վճռին ներկայացվող պահանջները: