Արտահերթ խորհրդարանական ընտրություններից հետո էլ Հայաստանում ներքաղաքական լարվածության համար շատ առիթներ կլինեն, իսկ դա լավագույն ֆոնը չէ Լեռնային Ղարաբաղի շուրջ բանակցությունների համար: Այս մասին «Интерфакс-Азербайджан»-ի հետ զրույցում ասել է ռուս քաղաքագետ Միխայիլ Նեյժմակովը:
Նրա խոսքով, Ռոբերտ Քոչարյանն ու Սերժ Սարգսյանը իրենց նախագահության օրոք ղարաբաղյան թեմատիկայով հայտարարություններում ավելի շատ մանևրելու տարածություն են ունեցել: Միևնույն ժամանակ, նկատել է նա, և՛ Բաքվին, և՛ Երևանին այժմ էլ ձեռնտու է գոնե նշմարել համագործակցության պատրաստակամությունը, քանի որ ժամանակակից իրողություններում մյուս կողմի հետ շփումների նվազեցումը կարող է աջակցություն ստանալ ներքին լսարանի կողմից, բայց ոչ միջազգային հարթակներում՝ դա իմիջային լավագույն ռազմավարությունը չէ:
«Կարելի է սպասել ղարաբաղյան հակամարտության կարգավորմանն ուղղված բանակցային գործընթացի որոշակի ակտիվացում 2019 թվականի հունվարին: Նախ, այդ ժամանակ ընտրությունները տեղի ունեցած կլինեն և ՀՀ-ում կձևավորվի նոր կառավարություն: Ի դեպ, Դուշանբեում Իլհամ Ալիևի և Նիկոլ Փաշինյանի հանդիպումն էլ տեղի ունեցավ ոչ պակաս Երևանի ավագանու ընտրություններից հետո: Բացի այդ, դեկտեմբեր-հունվար ամիսներին միջազգային միջնորդները փոքր-ինչ ավելի ակտիվ են լինում. հիշենք՝ 2018 թվականի հունվարին Կրակովում հանդիպեցին ՀՀ և Ադրբեջանի արտգործնախարարները: Բայց անգամ եթե նման հանդիպումներ տեղի ունենան 2019-ի սկզբին, դրանք, ըստ ամենայնի, կլինեն ուղղակի «բանակցություններ բանակցությունների մասին»»,- նշել է Նեյժմակովը:
Անդրադառնալով ԱՄՆ նախագահի ազգային անվտանգության հարցերով խորհրդական Ջոն Բոլթոնի երևանյան հայտարարություններին ու դրանց Նիկոլ Փաշինյանի արձագանքին, ռուս քաղաքագետը նշել է, որ այս ամենը վկայում է այն մասին, որ Երևանի համար ընդունելի լուրջ առաջարկներ Փաշինյանը Բոլթոնից չի ստացել:
«Փաշինյանը բավականին սուր արձագանքեց Բոլթոնին՝ նշելով, յուրաքանչյուրը կարող է հանդես գալ իր անունից, բայց Բոլթոնը կամ մեկ ուրիշը չի կարող հանդես գալ ՀՀ վարչապետի անունից: Իհարկե, Փաշինյանը այս կերպ փորձեց հերթական անգամ կասեցնել այն լուրերը, թե գաղտնի բանակցություններ են տարվում Լեռնային Ղարաբաղի հիմնախնդրի շուրջ՝ նման խոսակցությունները ընտրությունների նախաշեմին իր համար ձեռնտու չեն: Բայց, կարծում եմ, որ եթե ՀՀ վարչապետի պաշտոնակատարը իսկապես իր համար ընդունելի առաջարկներ ստանար Բոլթոնից (և ոչ միայն Ղարաբաղով), ապա արձագանքը դժվար թե այսքան սուր լիներ»,- նշել է նա:
