Ամենաուշը մայիսին կամ հունիսին. Նիկոլ Փաշինյանը` ԱԺ արտահերթ ընտրությունների մասին

824

ՀՀ վարչապետ Նիկոլ Փաշինյանը երաշխիքներ է ուզում, որ հակաժողովրդական գործընթացներ չեն ձեռնարկվի ԱԺ արտահերթ ընտրությունների նախաշեմին:

Facebook-ի ուղիղ եթերում նա, անդրադառնալով այդ հարցին, նշեց, որ գործող Սահմանադրության համաձայն մեխանիզմն այն է, որ վարչապետը պետք է հրաժարական տա, որից հետո խորհրդարանը երկու շաբաթվա ընթացքում երկու անգամ չընտրի նոր վարչապետ, որից հետո Ազգային ժողովը իրավունքի ուժով պետք է արձակվի: Փաշինյանի խոսքով, կառավարության ծրագրով, որն ընդունվել է խորհրդարանի կողմից, այս քաղաքական պայմանավորվածությունը հստակ արձանագրվել է խորհրդարանի, կառավարության և ժողովրդի կողմից: Սակայն նա քաղաքացիների շրջանում տրամադրություններ է տեսնում՝ ստանալ որոշակի երաշխիքներ, որ իրենք վարչապետի ենթադրվող հրաժարականից հետո նորից ստիպված չեն լինելու հեղափոխություն անել.

«Ես կարծում եմ, որ անհրաժեշտության դեպքում Հայաստանի քաղաքացիները կանեն այդ հեղափոխությունը, բայց, նաև մարդկանց այս ուղերձը ընկալելով, կարծում եմ, որ մենք պետք է ունենանք երաշխիքներ, որ հակաժողովրդական գործընթացներ ձեռնարկելու փորձեր չեն արվելու: Իսկ դրա համար կա երկու տարբերակ»,- նշեց Նիկոլ Փաշինյանը:

Առաջին տարբերակն, ըստ վարչապետի, այն է, որի մասին ինքն արդեն խոսել է` պետք է իրականացվեն սահմանադրական փոփոխություններ, որտեղ խորհրդարանի արձակումը կարող է տեղի ունենալ նաև առանց վարչապետի հրաժարականի: Այսինքն, խորհրդարանը ինքն ընդունի ինքնալուծարման մասին որոշում` եթե, այսպես ասած, կայուն մեծամասնություն գոյություն չունի կամ այլ պայմաններում: Փաշինյանը սա համարում է ամենաերաշխավորված տարբերակներից մեկը: Իսկ երկրորդ տարբերակն այն է, որ խորհրդարանական ուժերը ուղղակի այդ մասին ստորագրեն համաձայնագիր.

«Մենք գիտենք, որ այդ համաձայնագրերը կարող են բավարար չթվալ մեր հանրությանը, և հիմա աշխատում ենք սահմանադրական փոփոխությունների վրա: Փաթեթը շուտով պատրաստ կլինի, և մենք այն կուղարկենք խորհրդարան: Այս համատեքստում կունենանք քաղաքական քննարկումներ, ինչպես նաև ժողովրդի հետ քննարկումների արդյունքում կգանք ընդհանուր որոշումների: Բայց մեկ բան ակնհայտ է՝ ամենաուշը հաջորդ տարվա մայիսին կամ հունիսի առաջին տասնօրյակում ՀՀ-ում պետք է տեղի ունենան արտահերթ խորհրդարանական ընտրություններ»,- հայտարարեց վարչապետը:

Նա նաև հիշեցրեց, որ այսօր խորհրդարանը լուծարելու մեխանիզմ գոյություն չունի:


 

Տպել

Թեմայի այլ նորություններ
Загрузка...