Ադրբեջանի նախագահը թուլացրեց իր դիրքերը միջազգային ասպարեզում՝ այդ թվում անելով Երեւան ու Զանգեզու վերադառնալու մասին հայտարարություններ: Ադրբեջանում կայանալիք նախագահական ընտրություններին ընդառաջ արված հայտարարություններն ուղղված էին ներքին լսարանին:
Այս մասին Երեւանում մարտի 26-ին ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանի կայացած համատեղ ասուլիսի ժամանակ հայտարարեց ՌԴ Դաշնային ժողովի Պետդումայի ԱՊՀ գործերով, եվրասիական ինտեգրման եւ հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը: Նա խնդրեց, լուրջ չվերաբերել այդ հայտարարություններին, քանի որ կարծում է «այդտեղ մեկնաբանելու բան չկա»:
Բանախոսներն անդրադարձան միջխորհրդարանական համագործակցությանը եւ հայ-ռուսական հարաբերություններին: Զատուլինը եւս մեկ անգամ հաստատեց ռուսական մոտեցումը Արցախի հարցում՝ նշելով, որ իրենք հակամարտության բացառապես խաղաղ կարգավորման կողմնակից են: Հայ-ռուսական դաշնակցային հարաբերություններին անդրադառնալով, Զատուլինը նշեց, որ «Հայաստանին ուղղված ցանկացած սպառնալիք կամ հարձակում Ռուսաստանը դիտարկելու է որպես սպառնալիք իրեն, եւ՝ Հավաքական անվտանգության մասին պայմանագրի համապատասխան հոդվածների կիրառման հիմք»:
Լրագրողները հետաքրքրվեցին Ռուսաստանի կողմից Ադրբեջանին զենքի վաճառքի գործընթացի շարունակությամբ, ինչպես նաեւ Ալիեւի՝ Երեւանի եւ Զանգեզուրի հանդեպ նկրտումների հարցով եւ այս առիթով Ռուսաստանի հնարավոր գործողությունների մասին հարցերով:
Զատուլինը պատասխանեց, որ ՌԴ-ից Ադրբեջանին զենքի վաճառքը շարունակվում է նախօրոք կնքված պայմանագրերի հիման վրա: Բացի դրանից, խոսքը գնում է հասարակ սպառազինության եւ պաշտպանական միջոցների մասին, այլ ոչ թե ժամանակակից միջոցների մասին, որոնք, ռուս խորհրդարանականի խոսքով, «մատակարարվել են Հայաստանին` Ադրբեջանից տարբերվող պայմաններով»:
Նա վերահաստատեց, որ Ռուսաստանը կատարելու է պաշտպանության և անվտանգության ոլորտներում Հայաստանի նկատմամբ ունեցած իր դաշնակցային պարտավորությունները: Կոնստանտին Զատուլինը նաև ասաց, որ այդ հարցում լրացուցիչ անգամ համոզվել են՝ երեկ այցելելով Գյումրիում տեղակայված ռուսական 102-րդ ռազմական բազա։
«Ռուսաստանը ՀԱՊԿ շրջանակներում հետագայում ևս Հայաստանի նկատմամբ ցանկացած հարձակում կամ ռազմական վտանգ դիտարկելու է որպես վտանգ իր՝ Ռուսաստանի իր նկատմամբ: Մենք հասկանում ենք, որ 2016թ.-ի բռնկումից հետո, որը սադրել էր կողմերից մեկը, հայկական կողմը դժգոհ էր նրանից, որ Ռուսաստանի Դաշնությունն սպառազինություն է մատակարարել Ադրբեջանին: Մենք ափսոսում ենք, որ Ադրբեջանը չգտավ այդ զենքի կիրառության այլ տարբերակ, քան՝ խախտել հրադադարի ռեժիմը շփման գծում: Մենք հետևություններ ենք արել այս ամենից», - հայտարարեց Կոնստանտին Զատուլինը։
«Ուզում եմ հրավիրել ձեր ուշադրությունը նրա վրա, որ Ռուսաստանը Հայաստանին է տրամադրել ժամանակակից պաշտպանության միջոցներ, որոնք հույս ունեմ կտեսնեք շքերթի ժամանակ»,- հավելեց նա:
Անդրադառնալով Ալիեւի հայտարարություններին՝ Զատուլինը նշեց, որ «Ադրբեջանի նախագահը թուլացրեց իր դիրքերը միջազգային ասպարեզում՝ նման հայտարարություններ անելով»: Ըստ Զատուլինի, նախագահական ընտրություններին ընդառաջ արված հայտարարություններն ուղղված էին ներքին լսարանին: «Խնդրում եմ, լուրջ մի վերաբերվեք դրան, կարծում եմ այդտեղ մեկնաբանելու բան չկա»,- նշեց ռուսական պատվիրակության նախագահի տեղակալը:
Համատեղ ասուլիսից հետո լրագրողները շարունակեցին հարցեր ուղղել Զատուլինին:
Նրան խնդրեցին մեկնաբանել տարածված կարծիքը, ըստ որի՝ Թուրքիան գրավել է Աֆրինը Ռուսաստանի լուռ համաձայնությամբ, եւ մտավախությունը, որ Թուրքիան եւ Ադրբեջանը կփորձեն կրկնել այդ սցենարը Արցախում՝ ստանալով ՌԴ լուռ համաձայնությունը ռազմական գործողություններ սկսել: «Հայաստանի հետ հարաբերությունների զարգացման հարցով մենք չենք խորհրդակցում Թուրքիայի կամ որեւէ մեկի հետ: Դրա համար ո՛չ առիթ, ո՛չ պատճառ չկա»,- ասաց Զատուլինը:
Անդրադառնալով Թուրքիայի՝ Ռուսաստանի լուռ համաձայնությամբ գործողություններ կատարելուն, Զատուլինը կարծիք հայտնեց, որ Ռուսաստանն այդ աստիճան առաջնորդող դեր չունի Թուրքիայի համար, որ արգելի կամ թույլ տա որեւէ բան:
«Թուրքիյում լավ գիտեն Հավաքական անվտանգության պայմանագրի մասին, այդ իսկ պատճառով Հայաստանին սպառնացող որեւէ ռազմական վտանգ Թուրքիայի կողմից ես չեմ տեսնում»,- ասաց Զատուլինը: Նա բացառեց Աֆրինի սցենարի կրկնությունը Արցախում, թեեւ ընդունեց, որ կա խնդիր, որը, սակայն պետք է լուծել խաղաղ ճանապարհով:
